Shyǵys Qazaqstanda eki jolda kólik qozǵalysyna tyıym salynady
ÓSKEMEN. KAZINFORM – Shyǵys Qazaqstan oblysynda qar kóshkini júrý qaýpi artýyna baılanysty eki jol jabylady.
ShQO tótenshe jaǵdaılar departamenti baspasóz qyzmetiniń málimetine súıensek, oblystyq mańyzy bar eki jolda avtokóliktiń barlyq túri úshin qozǵalys jabyldy.
– Saǵat 18-00-den bastap Óskemen-Tarǵyn-Samar tasjolynyń 88-145 shaqyrymy (Joǵarǵy Taıynty men Samar arasy), saǵat 20-00-den bastap Óskemen-Taýly Úlbi-Soltústik tasjolynyń 30-60 shaqyrymy (Zoıa Kosmodemıanskaıa lageri men Soltústik jolynyń arasy) jabyq bolady, - dep habarlady vedomstvo ókilderi.
Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.
Eske salsaq, keshe aýa raıynyń buzylýyna baılanysty eki oblysta jol jabylǵan bolatyn.