Shyǵys Qazaqstanda bıyl 650-ge jýyq azamat sarbaz atanady
ÓSKEMEN. KAZINFORM – Shyǵys Qazaqstan oblysynda kóktemgi áskerge shaqyrý naýqanynda tsıfrlyq servıster belsendi qoldanylmaq. Jospar boıynsha bıyl ásker qataryna shamamen 650 azamat jiberiledi.
Áskerge shaqyrý naýqany 1 naýryzda bastalyp, 30 maýsymǵa deıin jalǵasady. Sońǵy jyldardaǵy negizgi ózgeristerdiń biri - áskerı esep júıesin tsıfrlandyrý.
ShQO Qorǵanys isteri jónindegi departamenttiń málimetinshe, búginde áskerı mindettiler men áskerge shaqyrylýshylardy esepke alý tolyqtaı elektrondy formatqa kóshirilgen. Bul áskerı basqarý organdarynyń jumysyn avtomattandyrýǵa jáne derekterdi óńdeý protsesin jedeldetýge múmkindik berip otyr.
- Áskerı mindettiler men áskerge shaqyrylýshylardy esepke alý tsıfrlyq formatqa aýystyryldy. Osylaısha, jergilikti áskerı basqarý organdarynyń jumysy avtomattandyryldy. Áskerge shaqyrýdy keıinge qaldyrý nemese odan bosatý eGov elektrondy úkimet portaly arqyly rásimdeledi, - dedi departament bastyǵynyń orynbasary Qazbek Ahmetov.
Endi shaqyrylýshylar ózderiniń áskerı qyzmetke qatysty mártebesi týraly aqparatty eGov portaly arqyly elektrondy túrde ala alady. Sondaı-aq áskerge shaqyrýdy keıinge qaldyrý nemese odan bosatý sııaqty memlekettik qyzmetter de osy portal arqyly kórsetiledi.
Azamattardy áskerı komıssarıatqa kelý qajettigi týraly habardar etý birneshe tásilmen júzege asyrylady. Atap aıtqanda, dástúrli túrde turǵylyqty jeri nemese jumys orny boıynsha shaqyrý qaǵazyn tapsyrý, 1414 qyzmetinen keletin SMS-habarlamalar jáne eGov.kz, eOtinish.kz portaldary men eGov Mobile qosymshasynan jiberiletin elektrondy habarlamalar arqyly.
Eger shaqyrylýshy osyndaı habarlama alsa, belgilengen ýaqytta áskerı komıssarıatqa kelýge mindetti.
- Áskerı qyzmet - árbir jas azamattyń zańmen bekitilgen mindeti. Odan jaltarý ákimshilik jáne qylmystyq jaýapkershilikke ákeledi, - dedi Qazbek Ahmetov.
Eske salsaq, osyǵan deıin Qyzylordada qansha adam áskerge barýdan jaltaryp júrgeni jaıly jazǵanbyz.
