Shyǵys Qazaqstanda bıyl 13 ret orman órtendi

ÓSKEMEN. KAZINFORM – Shyǵys Qazaqstan oblysynda jyl basynan beri ormanda 13 ret órt shyqqan. 

ShQO tótenshe jaǵdaılar departamenti bıylǵy órt qaýpi joǵary kezeńdi qorytyndylady. Oblys boıynsha ormanda shyqqan 13 órttiń jalpy aýmaǵy 1,1 gektardy quraǵan. Sondaı-aq 228 gektar jerdi sharpyǵan 13 dala órti tirkelgen.

«Órtterdiń basym bóligi naızaǵaıdan shyqty. Tilsiz jaýdyń aldyn alý jáne jedel den qoıý maqsatynda qutqarýshylar, polıtseıler, ormanshylar jáne jergilikti atqarýshy organ ókilderinen quralǵan 52 mobıldi top jumys istedi. Bul toptar 1 618 reıd ótkizip, zań talaptaryn buzǵan 61 adamdy ákimshilik jaýapkershilikke tartty», - deıdi TJD Memlekettik órt baqylaý basqarmasynyń bastyǵy Nurjan Ómirjanov.

Sonymen qatar aýyl sharýashylyǵy taýary óndirýshilerimen jáne sharýa qojalyqtarynyń basshylarymen 325 dóńgelek ústel ótkizildi. Turǵyndarǵa 4 066 nusqaýlyq berilip, kóshelerge 11 aqparattyq banner ornatyldy.

Eske salsaq, osyǵan deıin Shyǵys Qazaqstanda tútin tumshalaǵan úıden anasy men eki balasy qutqarylǵany habarlanǵan.