Shyǵys Qazaqstanda aýrýhana men perzenthana qurylysyna 105,7 mlrd teńge bólindi
ASTANA. KAZINFORM- Shyǵys Qazaqstan oblysynyń Óskemen qalasynda jańa kópbeıindi aýrýhana salý, Ana men bala ortalyǵynyń perzenthanasyn rekonstrýktsııalaý jáne jol ınfraqurylymyn damytý jobalaryna 105,7 mlrd teńge bólindi, dep habarlaıdy Úkimettiń baspasóz qyzmeti.
Bul jumystar Memleket basshysy Qasym-Jomart Toqaevtyń Quryltaıdyń birinshi sessııasynda bergen tapsyrmalaryn oryndaý aıasynda júzege asyrylyp jatyr.
Densaýlyq saqtaý salasyndaǵy negizgi jobalardyń biri – Óskemenniń 19-shaǵyn aýdanynda salynyp jatqan 300 oryndyq kópbeıindi aýrýhana. Aýmaǵy 42,5 myń sharshy metr bolatyn jańa medıtsınalyq mekeme qoldanystaǵy oblystyq aýrýhananyń múmkindikterin almastyrady. Jobany júzege asyrýǵa jergilikti bıýdjetti qoldaý maqsatynda memleket qosymsha 33,3 mlrd teńge bóldi.
Qazir medıtsınalyq jabdyqtardy satyp alý aıaqtalǵan. Nysanda beton quıý, topyraq qazý jáne aýmaqty tegisteý jumystary júrgizilip jatyr. Qurylys jumystarynyń jalpy daıyndyq deńgeıi 28%-dy quraıdy. Aýrýhanany 2027 jyldyń sońyna deıin aıaqtaý josparlanǵan.
Medıtsınalyq mekeme bes mamandandyrylǵan blok pen eki ótpeli galereıadan turady. Munda hırýrgııa, travmatologııa, kardıologııa, neırohırýrgııa bólimsheleri, ınsýlt ortalyǵy jáne basqa da bólimder ornalasady. Aýrýhana jylyna 13,6 myń patsıentke qyzmet kórsetýge eseptelgen.
Sonymen qatar Óskemendegi Ana men bala ortalyǵynyń statsıonar ǵımaratyn perzenthana retinde rekonstrýktsııalaý jumystary jalǵasyp jatyr. Bul maqsatqa 2026 jyly qosymsha 2,4 mlrd teńge bólindi. Joba aıasynda ǵımarat pen ınjenerlik jelilerdi jańartý, sondaı-aq nysandy zamanaýı tehnologııalyq jabdyqtarmen jaraqtandyrý kózdelgen.
Jalpy aýdany 12,2 myń sharshy metr bolatyn ǵımarattyń daıyndyq deńgeıi 90%-ǵa jetti. Perzenthanany 2026 jyldyń tórtinshi toqsanynda paıdalanýǵa berý josparlanǵan. Nysan iske qosylǵannan keıin kúrdeli patologııalardy emdeýge jumsalatyn shyǵyndardy azaıtyp, akýsherlik kómektiń sapasyn edáýir jaqsartýǵa múmkindik týady.
Shyǵys Qazaqstan oblysynda jyl saıyn orta eseppen 5 300 bala dúnıege keledi. Rekonstrýktsııa aıaqtalǵannan keıin perzenthana jylyna qosymsha 2 myńǵa deıin áıeldi bosandyrýǵa qabyldaı alady.
Budan bólek, Óskemende Ertis ózenindegi kópirden Serikbaev kóshesine ótetin joldy ashý, sondaı-aq Sátbaev dańǵyly men Jibek joly kóshesiniń qıylysyndaǵy jol aıryǵyn qaıta jańǵyrtý jobalary júzege asyrylyp jatyr.
Osyǵan deıin Qazaqstanda qurylys qarqyny artyp, 9 aıda 7,8 trln teńgeniń jumysy oryndalǵany týraly jazdyq.
