Shyǵys Qazaqstanda alyp qyz bala dúnıege keldi
ÓSKEMEN. KAZINFORM – Shyǵys Qazaqstan oblysy Tarbaǵataı aýdanynda salmaǵy 5 keli alyp qyz bala týdy.
ShQO Densaýlyq saqtaý basqarmasy baspasóz qyzmetiniń málimetine súıensek, Naýryz meıramy bastalǵaly Tarbaǵataı aýdandyq aýrýhanasynda 9 sábı dúnıe esigin ashqan.
- Jańa týǵan náresteler ulttyq kıim kıgizilip, shyǵaryldy. Olardyń arasynda salmaǵy 5 kelige jetetin alyp qyz da boldy. Ata-anasy oǵan Begimaı dep at qoıdy, - delingen aqparatta.
Budan bólek, Naýryz meıramyna oraı Rıdder qalasynyń mádenıet saraıynda saltanatty túrde tusaýkesý rásimi ótti. Barlyǵy 22 balanyń tusaýy kesilip, aqsaqaldar keńesiniń músheleri aq batasyn berdi. Balalarǵa merekelik syılyqtar da taratyldy.
Eske salsaq, buǵan deıin Naýryz meıramy qarsańynda Astana qalasyndaǵy servıs jáne týrızm kolledj ujymy umytylyp bara jatqan qazaqtyń dástúrli taǵamy – jentti daıyndaýdy qolǵa alyp, 15 metrlik jent jasaǵanyn jazǵan bolatynbyz.