Shyǵys Qazaqstanda alaıaqtar ózderin kommýnaldyq qyzmetker retinde tanystyryp júr
ÓSKEMEN. KAZINFORM – Shyǵys Qazaqstan oblysynda alaıaqtar halyqty aldaýdyń jańa ádisine kóshti. Endi olar turǵyndarǵa telefon shalyp, ózderin kommýnaldyq qyzmetker retinde tanystyryp júr.
Sońǵy kúnderi óńir jurtshylyǵyna qońyraý shalǵan alaıaqtar ózderin óńirlik elektr kompanııasynyń qyzmetkeri retinde tanystyra bastady. Sóz arasynda halyqqa elektr eseptegishterin tegin aýystyryp beretindikterin alǵa tartady.
Osylaı senimge kirip alady da uıaly telefonǵa SMS-habarlama jibergenderin aıtady. Sóıtip sondaǵy kodty aıtyp jiberýlerin suraıdy. Al kodty bilgen soń atyna qas qaǵymda nesıe rásimdep jiberedi.
«Bizdiń kompanııa qyzmetkerleri esh ýaqytta halyqqa habarlasyp, kod suramaıdy. Bul - alaıaqtar. Osy arqyly sizdiń jeke derekterińizge qol jetkizip almaqshy. Sondyqtan da barynsha abaı bolyńyzdar», - dep habarlady «ÓEK» AQ-dan.
Eske salsaq, osyǵan deıin ShQO turǵyndaryn aldap, 106 mln teńge paıda kórgen eki alaıaqtyń jazasy qatańdatylǵany habarlanǵan.
