Shyǵys Qazaqstanda alaıaq bir páterdi 25 ret «satqan»
ÓSKEMEN. KAZINFORM — Shyǵys Qazaqstan oblysynda páter satamyn dep ondaǵan adamdy aldaǵan er adam 186 mln teńge paıda kórgen.
Shyǵys Qazaqstan oblysy polıtsııa departamenti baspasóz qyzmetiniń málimetine qaraǵanda, polıtsııaǵa óńirdiń 25 turǵyny júgingen. Olardyń barlyǵy baspanany tıimdi baǵamen satyp alamyz dep aldanyp qalǵan.
Alaıaqtyq shema 2024 jylǵy qarashadan 2026 jylǵy sáýirge deıin júzege asqan. Er adam turǵyndarǵa memlekettik baǵdarlama arqyly úı alýǵa kómektesetinine sendirip, qujattardy rásimdeý máselelerin ózi sheship berýge ýáde bergen.
Aqshany jábirlenýshiler oǵan qolma-qol da, bank shottaryna aýdarý arqyly da bergen. Alaıda alǵashqy tólemmen shyǵyndar bitpedi. Keıin páterdi tirkeý, qujattardy rásimdeý jáne basqa da rásimder úshin qosymsha aqsha talap etilgen. Bolashaq baspana ıeleriniń kúmánin seıiltý úshin kúdikti naqty páterdi de paıdalanǵan. Alaıda ol turǵyn úı er adamnyń ózine tıesili bolmaǵan.
— Senimge kirý úshin ol páter jaldap, ony jábirlenýshilerge bolashaq baspanasy retinde kórsetken. Adamdar kóp uzamaı páterdiń kiltin alady degen úmitpen aqsha berýdi jalǵastyrǵan. Osylaısha Shyǵys Qazaqstan oblysynyń 25 turǵyny zardap shekti. Keltirilgen jalpy shyǵyn kólemi 186 mln 445 myń teńge boldy, — delingen aqparatta.
Jábirlenýshiler aqyrynda páterdiń kiltin de, tıisti qujattardy da ala almaǵan. Kúdikti ustalyp, polıtsııaǵa jetkizildi. Qazir ol ýaqytsha ustaý ızolıatorynda qamaýda otyr. Er adam jaýap alý kezinde kinásin moıyndady.
Eske salsaq, osyǵan deıin alaıaqtar 4 kúnde 150 myń SMS taratyp, azamattardyń aqshasy men jeke deregin ıemdenbek bolǵanyn habarlanǵanbyz.
