Shyǵys Qazaqstanda adamdar arasynda brýtsellez juqtyrǵandar sany artty
ÓSKEMEN. KAZINFORM — Shyǵys Qazaqstan oblysynda adamdar arasynda brýtsellez juqtyrǵandar sany artyp otyr.
Oblystyq sanıtarlyq-epıdemıologııalyq baqylaý departamentiniń habarlaýynsha, óńirde zoonozdyq ınfektsııalardyń juǵýy men taralýynyń aldyn alý úshin tıisti sharalar qabyldanyp jatyr.
— Shyǵys Qazaqstanda ótken jyldyń sáıkes kezeńinde úsh adam brýtsellez juqtyrsa, bıyǵy jyldyń basynan beri osyndaı bes jaǵdaı anyqtalǵan. Brýtsellez Tarbaǵataı jáne Zaısan aýdandarynda tirkeldi. Mamandar árbir jaǵdaı boıynsha adamdarǵa epıdemııalyq jáne epızootııalyq sharalar júrgizip, aýrý kózderi men juǵý faktorlaryn anyqtady, — delingen aqparatta.
Infektsııanyń bes oshaǵy men baılanysta bolǵan 16 adam tirkeldi. Bul adamdar tekserýden ótip, alty aı boıǵy dıspanserlik baqylaýǵa alyndy. Sonymen qatar oshaqtarda 12 synama alynyp, et óniminen bir oń nátıje anyqtalǵan.
Eske salsaq, osyǵan deıin Batys Qazaqstanda 800-den astam iri qara brýtsellez aýrýyna shaldyqqany habarlanǵan.
