Shyǵys Qazaqstanda 63 bala qyzylsha juqtyrǵan
Shyǵys Qazaqstan oblysynda bıyl 63 bala qyzylsha juqtyrdy, dep habarlaıdy Kazinform.
ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, óńir boıynsha jyl basynan beri qyzylsha juqtyrǵan 74 adam tirkeldi. Aýyrǵandardyń basym bóligi, naqty aıtqanda 85,1%-y 14 jasqa deıingi balalar (63 jaǵdaı).
«Naýqastardyń 81,1%-y qyzylshaǵa qarsy vaktsına saldyrmaǵan. Onyń ishinde 17 patsıent josparly vaktsınatsııa jasyna jetpese, 16 adamda medıtsınalyq qarsy kórsetilimder boldy. Al 23 adam vaktsına saldyrýdan óz erkimen bas tartsa, 4 adam ekpe alý múmkindigin ótkizip alǵan», - deıdi basqarma basshysy Qanat Turdıev.
Júrgizilgen epıdemıologııalyq tekserý nátıjesinde 17,6% nemese 13 adamnyń qyzylshany Almaty, Atyraý qalalarynda, Túrkııa jáne Tájikstan elderinde juqtyrǵany anyqtaldy.
Naýqastarmen baılanysta bolǵan 68 adamǵa qyzylshaǵa qarsy ekpe egildi, onyń ishinde 14 jasqa deıingi 31 bala bar.
