Shyǵys Qazaqstanda 618,1 myń gektarǵa aýyl sharýashylyǵy daqyldary egiledi
ÓSKEMEN. KAZINFORM – Shyǵys Qazaqstan oblysynda kóktemgi egis jumystary júrgizilip jatyr.
ShQO Aýyl sharýashylyǵy basqarmasynyń málimetine súıensek, óńir boıynsha bıylǵy egis alqaby ótken jylǵy deńgeıden 10,8 myń gektarǵa artyp otyr.
- 2024-2025 jylǵy kúzgi-qysqy kezeńde jaýyn-shashyn mólsheri normadan kóp boldy. Bul kóktemgi dala jumystary úshin asa mańyzdy. Jospar boıynsha egis alqabyndaǵy dándi jáne dándi-burshaqty daqyldar 252,6 myń gektardy, onyń ishinde bıdaı 171 myń gektardy, maıly daqyldar 224,5 myń gektardy, onyń ishinde kúnbaǵys 206,6 myń gektardy, jemshóp daqyldary 129 gektardy, kartop 8,5 myń gektardy, kókónister men qaýyndar 3,8 myń gektardy quraıdy, - delingen aqparatta.
Aýyl sharýashylyǵy taýar óndirýshileriniń tuqymǵa qajettiligi 73,2 myń tonnany quraıdy. Onyń ishinde 54,2 myń tonna dándi daqyldar, 3,2 myń tonna maıly daqyldar, 0,8 myń tonna jemshóp daqyldary, 15 myń tonna kartop bar. Barlyq tuqym materıaly egis jumystary bastalǵanǵa deıin sapalyq kórsetkishterge tekseriledi. «Qazagreks» derekteri boıynsha tekserýge 64,9 myń tonna dándi daqyldar tuqymy nemese qajettiliktiń 85% tústi. 62,7 myń tonna tuqym tekserildi. Onyń 61,9 myń tonnasy nemese 98,9% sapaly boldy.
- 2025 jyly topyraqtyń qunarlylyǵyn arttyrý úshin 60,8 myń tonna mıneraldy tyńaıtqysh satyp alý qajet. Búgingi tańda mıneraldy tyńaıtqyshtar óndiretin zaýyttarmen 35,6 myń tonna tyńaıtqyshqa sharttar jasaldy, onyń ishinde 20 myń tonnaǵa jýyǵy jóneltildi. Oblys sharýashylyqtaryna 9065 traktor, 7116 egis jáne topyraq óńdeý tehnıkasy qajet. Mashına-traktor parkin jańartý boıynsha kórsetkishti 6,5% oryndaý úshin bıyl 1321 traktor men 140 kombaındy esepten shyǵarý qajet. Sondaı-aq ózdiginen júretin 484 tehnıkany satyp alý josparlanyp otyr. Búginde 3 mlrd teńgege 66 traktor, 1 mlrd teńgege 6 astyq jınaıtyn kombaın satyp alynǵan, - delingen habarlamada.
Aıta keteıik, osy jyly Shyǵys Qazaqstandaǵy kóktemgi dala jumystary úshin jergilikti bıýdjetten 6,1 mlrd teńge sýbsıdııa bólý kózdelgen.
Eske salsaq, osyǵan deıin Abaı oblysynda 753,1 myń gektarǵa aýyl sharýashylyǵy daqyldary egilgeni jaıly jazǵanbyz.