Shyǵys Qazaqstanda 6 qarjy pıramıdasy halyqqa 400 mln teńgeden astam zalal keltirgen

ÓSKEMEN. KAZINFORM – Shyǵys Qazaqstan oblysynda 6 qarjy pıramıdasynyń joly kesildi.

ShQO Ekonomıkalyq tergeý departamentiniń málimetine súıensek, eń iri alaıaqtyq shemalarǵa barǵandar - «Chia Tai-Tianqing Pharmaceutical» pen «Eolus». Olar tek oblysta emes, búkil el aýmaǵynda áreket etken.

Qarjylyq pıramıdalardan zardap shekkender jyldam ári ońaı aqshany ýáde bergen alaıaqtarǵa senip qalǵan. Barlyǵy 250-den astam óńir turǵyny 400 mln teńgeden astam shyǵynǵa batqan. Sonymen qatar oblysta alaıaqtarǵa bank kartalary men jeke derekterin berý, ıaǵnı «dropperlik» máselesi de ózekti bolyp otyr.

- Tek Shyǵys Qazaqstan oblysynyń ózinde 6,2 myńnan astam «drop-karta» anyqtaldy. Bul kartalar arqyly 24 mlrd teńgege jýyq qarjy aınalymy tirkelgen. Kóp jaǵdaıda «dropperler» qataryna stýdentter, zeınetkerler jáne jumyssyz azamattar kiredi. Olar ózderiniń qylmystyq shemaǵa qatysyp jatqanyn túsinbeıdi, - deıdi departamenttiń uıymdastyrý-baqylaý basqarmasynyń basshysy Janar Taıǵaranova.

Onyń aıtýynsha, qarjy pıramıdalaryn uıymdastyrýshylarǵa qatysty sot úkimi shyǵarylyp, aıyptalýshylar bas bostandyǵynan aıyryldy.

Eske salsaq, osyǵan deıin Mańǵystaý oblysynda halyqty qanaǵan qarjy pıramıdasy anyqtalǵany jaıly habarlaǵan edik.