Shyǵys Qazaqstanda 6 adam qos azamattyqpen júrgen
ÓSKEMEN. KAZINFORM – Shyǵys Qazaqstan oblysynda qos azamattyǵy bar 6 adam elden shyǵaryldy.
ShQO polıtsııa departamenti baspasóz qyzmetiniń málimetine súıensek, jyl basynan beri kóshi-qon qyzmetiniń mamandary 450-den astam adamnyń Qazaqstan Respýblıkasy azamattyǵynan shyqqanyn tirkedi. Olardyń basym bóligi kórshi memlekettiń azamattyǵyn alǵan.
- Zań talaptaryn buzǵany úshin 31 adam ákimshilik jaýapkershilikke tartyldy. Onyń ishinde 24 azamat sheteldik azamattyqty alǵany týraly ýaqtyly habarlamaǵan, al azamattyǵyn joǵaltqannan keıin Qazaqstan Respýblıkasynyń qujattaryn zańsyz paıdalanǵan 6 sheteldik azamat sot sheshimimen el aýmaǵynan shyǵaryldy, - delingen aqparatta.
Anyqtalǵan jaǵdaılardyń biri Óskemen qalasynyń 43 jastaǵy turǵynyna qatysty. Ol 2024 jyldyń qazan aıynda ózge memlekettiń azamattyǵyn alǵanymen, zańda belgilengen merzimde ishki ister organdaryna habarlamaǵan. Osylaısha, áıelden Qazaqstan Respýblıkasy azamattyǵynan shyǵarylyp, el qujattary tárkilendi.
Osy rette, tártip saqshylary ózge memlekettiń azamattyǵyn alǵan jaǵdaıda, azamattar 30 kún ishinde bul týraly ishki ister organdaryna habarlap, Qazaqstan Respýblıkasynyń azamattyǵyn kýálandyratyn qujattardy tapsyrýǵa mindetti ekenin eskertedi. Bul talapty buzǵandarǵa ákimshilik jaýapkershilik qarastyrylǵan.
Eske salsaq, osyǵan deıin Túrkistan oblysynda kóshi-qon zańnamasyn buzǵan 181 adam jaýapqa tartylǵany habarlanǵan.
