ShQO-da 45 metrlik kópir ashyldy: Osınov asýyn aınalyp ótetin jańa jol daıyn
ASTANA. KAZINFORM — Shyǵys Qazaqstanda bıiktigi 45 metrlik Pıhtovka kópiri paıdalanýǵa berilip, Óskemen – Altaı baǵytyndaǵy 28 shaqyrym jol qaıta jańǵyrtyldy. Jańa jol Osınov asýynyń qaýipti burylystaryn aınalyp ótýge múmkindik beredi. Bul týraly Kólik mınıstrligi málim etti.
Shyǵys Qazaqstan oblysynda Pıhtovka ózeni arqyly salynǵan jańa kópirmen kólik qozǵalysy saltanatty túrde ashyldy. Іs-sharaǵa Qazaqstan Respýblıkasy Premer-mınıstriniń birinshi orynbasary Nurlybek Nálibaev, Shyǵys Qazaqstan oblysynyń ákimi Nurymbet Saqtaǵanov, Kólik vıtse-mınıstri Damır Qojahmetov, «QazAvtoJol» UK» AQ Basqarma tóraǵasy Darhan Imanashev, jol salasy uıymdarynyń ókilderi jáne basqa da qatysýshylar qatysty.
— Bıiktigi 45 metrge jetetin jańa kópirdiń ashylýymen qatar, respýblıkalyq mańyzy bar «Óskemen — Altaı — Úlken Naryn — Katonqaraǵaı — Rahman qaınary» avtojolynyń 28 shaqyrymynda qaıta jańǵyrtýdyń negizgi jumystary aıaqtaldy. Jańa jol Osınov asýynyń kúrdeli buralań bóligin aınalyp ótýge múmkindik beredi. Bul qozǵalys qaýipsizdigin arttyryp, óńirdegi eldi mekender men týrıstik nysandarǵa qatynaýdy jeńildetedi, — delingen vedomstvo habarlamasynda.
Jańa baǵyttaǵy eń iri ınjenerlik nysan — Pıhtovka ózeni arqyly salynǵan uzyndyǵy 175 metrlik kópir. Onyń taý shatqalyndaǵy bıiktigi 45 metrge deıin jetedi. Kópir jeti aralyq pen segiz tirekten turady. Qurylysyna 79 temirbeton paıdalanylǵan.
Qurylys kúrdeli taýly jerde júrgizilip, arnaıy ınjenerlik sheshimderdi qajet etti. Atap aıtqanda, kópir taý bederiniń erekshelikterine qaraı ıilgen baǵytta salyndy.
Jańa joldyń ashylýy Shyǵys Qazaqstan úshin aıryqsha mańyzdy. Osınov asýy uzaq jyldar boıy respýblıkalyq joldardyń eń kúrdeli bólikteriniń biri sanalyp keldi. Kúrt burylystar, uzaq órler, qalyń qar men kóktaıǵaq, ásirese qys mezgilinde kólik qozǵalysyn edáýir qıyndatatyn.
Endi júrgizýshiler asýdyń eń kúrdeli buralań tustaryn aınalyp óte alady. Bul jyl boıy qaýipsiz ári turaqty kólik qatynasyn qamtamasyz etýge qolaıly jaǵdaı jasaıdy.
— Qaıta jańǵyrtý aıasynda 28 shaqyrym joldyń boıyna jol negiziniń tómengi jáne joǵarǵy qabattary, sondaı-aq asfaltbeton jamylǵysynyń eki qabaty tolyq tóseldi, — dep habarlady mınıstrlikten.
Qurylys barysynda 545 myń tekshe metr jer jumysy jáne 603 myń tekshe metr burǵylaý-jarý jumysy atqaryldy.
Sonymen qatar eki kópir men 38 sý ótkizý qubyry salyndy. Onyń ishinde mal aıdap ótkizýge arnalǵan eki ótkel bar. Qurylysqa 135 maman men 65 tehnıka jumyldyryldy.
Joldyń jańartylýy óńirdiń áleýmettik-ekonomıkalyq damýyna da oń yqpal etedi.
Altaı, Úlken Naryn jáne Katonqaraǵaı aýdandaryna qatynaý jeńildep, ishki týrızmdi, kásipkerlikti jáne júk tasymalyn damytýǵa jańa múmkindikter ashylady.
Pıhtovka ózeni arqyly ótetin kópirdiń paıdalanýǵa berilýi men 28 shaqyrym joldaǵy negizgi jumystardyń aıaqtalýy — Shyǵys Qazaqstannyń kólik ınfraqurylymyn jańǵyrtýdaǵy mańyzdy kezeń.
Aıta keteıik, buǵan deıin jańa joldyń iske qosylýy jol qozǵalysynyń qaýipsizdigin aıtarlyqtaı arttyratynyn jazdyq. Jaz mezgilinde demalys kúnderi ǵana Óskemennen Buqtyrma sý qoımasyna qaraı 20 myńnan astam avtokólik qatynaıdy. Jol paıdalanýǵa berilgennen keıin júrgizýshiler qaýipti Osınov asýyn aınalyp ótip, Altaı, Úlken Naryn jáne Katonqaraǵaı aýdandaryndaǵy týrıstik baǵyttarǵa áldeqaıda jyldam jete alady.
