Shyǵys Qazaqstanda 3,6 mlrd teńgege 131 veterınarııalyq nysan salynady
ASTANA. KAZINFORM – Shyǵys Qazaqstan oblysynda 2026–2027 jyldary 3 mlrd 633 mln teńgege 131 veterınarııalyq nysan salý josparlanyp otyr, dep habarlaıdy QR aýyl sharýashylyǵy mınıstrliginiń baspasóz qyzmeti.
Atalǵan nysandardyń ishinde 7 veterınarııalyq stantsııa, 70 veterınarııalyq pýnkt jáne 54 mal qorymy bar.
Joba veterınarııalyq qaýipsizdikti nyǵaıtýǵa, aýyldyq jerlerde veterınarııalyq qyzmetterdiń qoljetimdiligin arttyrýǵa jáne mal sharýashylyǵy sýbektilerine kórsetiletin qyzmet sapasyn jaqsartýǵa baǵyttalǵan.
Bıyl 60 nysannyń qurylysyna 1 mlrd 662,5 mln teńge bólingen. Al 2027 jyly taǵy 71 nysan salýǵa 1 mlrd 970,5 mln teńge qarastyrylǵan.
Nysandar óńirdiń aýmaqtyq erekshelikteri men qajettilikterine qaraı ornalastyrylady. Veterınarııalyq stantsııalar aýdan ortalyqtarynda, al veterınarııalyq pýnktter aýyldyq okrýgterde boı kóteredi.
Bul veterınarııalyq qyzmetterdi mal sharýashylyǵy sýbektilerine jaqyndatýǵa múmkindik beredi. Sondaı-aq ótinishterge jedel den qoıýǵa, profılaktıkalyq tekserýler men dıagnostıkalyq zertteýler júrgizýge jáne epızootııaǵa qarsy is-sharalardy ýaqytyly uıymdastyrýǵa jaǵdaı jasaıdy.
Qazirgi ýaqytta josparlanǵan 32 veterınarııalyq pýnkttiń 16-synyń qurylysy tolyq aıaqtalǵan. Budan bólek, salynýy kózdelgen 25 mal qorymynyń 12-si paıdalanýǵa daıyn.
Qalǵan nysandardyń qurylysy bekitilgen kestege sáıkes jalǵasyp jatyr.
Aýyl sharýashylyǵy mınıstrligi veterınarııalyq uıymdardyń materıaldyq-tehnıkalyq bazasyn jańǵyrtý jáne veterınarııalyq ınfraqurylymdy damytý jumystaryn jalǵastyryp keledi. Bul rette shalǵaı aýyldardy veterınarııalyq qyzmettermen qamtýǵa basymdyq berilip otyr.
Osyǵan deıin Aqtóbede veterınarııalyq stansa men pýnkt salýǵa mıllıardtar jumsalatyny týraly jazdyq.
