Shyǵys Qazaqstanda 23 myńnan astam adam qant dıabetine shaldyqqan

Shyǵys Qazaqstan oblysynda 23 473 adam qant dıabetine shaldyqqan, dep habarlaıdy Kazinform.

14 qarasha – Dúnıejúzilik qant dıabetimen kúres kúni. Bul kún 1991 jyly Dúnıejúzilik densaýlyq saqtaý uıymymen bekitilgen.

ShQO densaýlyq saqtaý basqarmasynyń málimetine súıensek, búginde óńir boıynsha 23 473 adam qant dıabetimen aýyrady.

«Aýrýdy bastapqy satysynda anyqtaý úshin halyqqa túsindirý jumystary barynsha júrgizilýde. Dúnıejúzilik densaýlyq saqtaý uıymynyń dereginshe, qant dıabetine shaldyqqandardyń 81 paıyzy tabysy tómen jáne ortasha elderde turady. Bul syrqattyń keńinen taralǵan eki túri bar. Birinshi túri - ınsýlınge táýeldilik. Kóbinese balalarda kezdesedi. Kún saıyn ınsýlın alyp turýdy qajet etedi. Aýrýdyń bul túriniń sebebi belgisiz, sondyqtan onyń aldyn alý múmkin emes», - deıdi basqarmanyń shtattan tys bas endokrınology Bıbinur Safıýllına.

Onyń aıtýynsha, qant dıabetiniń ekinshi túrinde ınsýlınge táýeldilik bolmaıdy. Eresek adamda bolatyn bul aýrý organızmniń ınsýlındi tıimsiz paıdalanýy nátıjesinde damıdy.

«Naýqastardyń kóbi osyǵan shaldyqqan. Negizinen artyq salmaq pen fızıkalyq qımyl-qozǵalystyń azdyǵynan bolady. Aýrýdyń belgileri birden baıqalmaýy múmkin. Sońǵy ýaqytqa deıin qant dıabetiniń mundaı túri tek eresekter arasynda baıqalsa, qazir balalarda da kezdesedi», - deıdi B.Safıýllına.