Shyǵys Qazaqstanda 15 adam kene entsefalıtin juqtyrdy
ÓSKEMEN. KAZINFORM — Shyǵys Qazaqstan oblysynda kene entsefalıtin juqtyrýdyń 15 faktisi tirkeldi.
ShQO sanıtarlyq-epıdemıologııalyq baqylaý departamentiniń málimetine súıensek, qazan aıynyń ortasyndaǵy jaǵdaı boıynsha óńirdiń endemııalyq aýmaqtarynda kene shaqqan 4479 adam medıtsınalyq kómekke júgingen.
Olardyń 1336-sy (29,8%) — 14 jasqa deıingi balalar. Byltyrǵy jyldyń sáıkes kezeńimen salystyrǵanda medıtsınalyq kómekke júgingender sany 547 adamǵa azaıǵan.
— Kene shaqqannan keıin medıtsınalyq kómekke júgingenderdiń 94 paıyzyna seroprofılaktıka júrgizildi. Qalǵan 6 paıyzy birneshe sebepterge baılanysty seroprofılaktıkadan ótpedi. Atap aıtqanda, buǵan kene endemııalyq emes aýmaqta shaqqany, adamnyń medıtsınalyq kómekke kesh júgingeni, ımmýnoglobýlın engizýden bas tartqany, ımmýnoglobýlın buǵan deıin engizilgeni, keneni zertteý nátıjesi teris bolǵany nemese adamnyń vaktsına almaǵany sebep boldy, — dedi departament basshysynyń orynbasary Sáýle Slıamǵazına.
Onyń aıtýynsha, oblysta kene entsefalıtin juqtyrýdyń 15 rastalǵan faktisi tirkelgen. Bul ótken jyldyń sáıkes kezeńimen salystyrǵanda tórt jaǵdaıǵa az.
Eske salsaq, osyǵan deıin Jambyl oblysynda JRVI-men aýyrǵandardyń 60%-y — balalar ekendigi habarlanǵan.
