Shyǵys Qazaqstanda 13 ýchaskede sel júrýi múmkin
ÓSKEMEN. KAZINFORM – Shyǵys Qazaqstan oblysynda 15 mamyrdan sel júrý qaýpi bar kezeń bastaldy.
Óńir boıynsha Altaı, Katonqaraǵaı, Zaısan aýdandaryndaǵy jáne Rıdder qalasyndaǵy 13 ýchaskede sel júrý qaýpi bar. Atalǵan aýdandardaǵy taýlardyń joǵarǵy jaqtarynda 11 eldi mekenge qaýip tóndiretin 144 morenalyq kól qalyptasqan.
Sel qaýpi kezeńinde «Qazseldenqorǵaý» mamandary kólderdiń jaı-kúıin, olardyń tolymdylyǵyn jáne sel men kóshkin aǵyndaryn qalyptastyrýǵa yqpal etetin faktorlardy baqylaýda ustaıdy.
- Oblysta 9 ýchaskede kóshkin qaýpi bar. Bul negizinen avtojoldarda, ózen basseınderinde, Rıdder qalasyndaǵy Gromotýha, Úbe, Altaı aýdanyndaǵy Buqtyrma, Hamır, Chernovaıa, Katonqaraǵaı aýdanyndaǵy Buqtyrma, Zaısan aýdanyndaǵy Kendirlik jaǵalyq eńister men taýlardyń kesindilerinde. Qaýipsizdik maqsatynda sel qaýpi bar ýchaskelerde 20 eskertý jáne tyıym salý qalqany, kóshkin qaýpi joǵary ýchaskelerde 18 qalqan ornatyldy. Nysandar men qurylystar ornalasqan sel júrýi yqtımal aımaqtardaǵy jergilikti atqarýshy organdarǵa, kásiporyn basshylaryna jáne jeke menshik ıelerine usynymdar berildi, - dep habarlady ShQO TJD baspasóz qyzmetinen.
Sel, kóshkin júrý qaýpi jaǵdaıyna monıtorıng júrgizý úshin 9 maýsymdyq jáne jyl boıy jumys isteıtin 1 gıdrobeket ornatylǵan.
Eske salsaq, buǵan deıin TJM mamandary terek mamyǵynyń qaýipti ekenin eskertkeni habarlanǵan.