Shyǵys Qazaqstanda 120 myń gektar jer memleketke qaıtaryldy

ÓSKEMEN. KAZINFORM – Shyǵys Qazaqstan oblysynda bir jylda 120 myń gektar jer memleket menshigine qaıtaryldy.

Oblys boıynsha paıdalanylmaı jatqan aýyl sharýashylyǵy jerlerin qaıtarý jumystary týraly óńirlik kommýnıkatsııalar qyzmetinde ótken brıfıngte ShQO jer qatynastary basqarmasynyń basshysy Nadejda Mıheılıs málim etti.

– Prezıdent tapsyrmasyna sáıkes, 2022 jyldan beri júrgizilip kele jatqan jumys nátıjesinde oblys boıynsha jalpy kólemi 463,8 myń gektar jer qaıtaryldy. Byltyr aımaq boıynsha 120 myń gektar jer memleket qaramaǵyna ótti, - dedi ol.

Búginde oblys aýmaǵy 9 785,9 myń gektardy quraıdy. Sonyń 36 paıyzy – aýyl sharýashylyǵy maqsatyndaǵy jerler, al 64 paıyzy ózge sanatqa jatady. 

– Qaıtarylǵan alqaptardy tıimdi paıdalaný – aýyl sharýashylyǵyn damytý men jaıylym tapshylyǵyn azaıtýdyń mańyzdy tetigi. 2026 jylǵa bekitilgen jospar 40 myń gektardy quraıdy. Qazirdiń ózinde onyń 14 myń gektary nemese 35 paıyzy memleket menshigine ótti, - deıdi N. Mıheılıs. 

Eske salsaq, osyǵan deıin bıyl jer qoınaýyn ıgerý kelisimsharttaryna revızııa jasalatyny habarlanǵan.