Shyǵys Qazaqstan VICh-pen aýyrǵandar kórsetkishi boıynsha elde aldyńǵy orynda tur

ÓSKEMEN. KAZINFORM – Shyǵys Qazaqstan oblysynda VICh-ınfektsııasyna shaldyqqandar sany ósip keledi. Bıyldyń ózinde 250-den astam jańa jaǵdaı anyqtalǵan.

Birneshe jyl qatarynan Shyǵys Qazaqstan adamnyń ımmýn tapshylyǵy vırýsymen (VICh) aýyrǵandar kórsetkishi boıynsha elde birinshi orynda tur. Qazirgi tańda oblys boıynsha osy dıagnozben 3 myńnan astam adam esepke qoıylǵan.

- Buryn VICh negizinen esirtki tutynýshylar arasynda taralsa, qazir juqtyrýdyń 60 paıyzy jynystyq jolmen berilgen. Bul geteroseksýaldy jáne gomoseksýaldy qatynastarǵa da qatysty, - dedi ShQO JITS-tiń aldyn alý jáne oǵan qarsy kúres ortalyǵynyń bas dárigeri Saltanat Fatıhova.

Oblystaǵy naýqastardyń 92 paıyzy antıretrovırýstyq terapııa alady. Bul emdeý tásili aýrýdy baqylaýda ustap, onyń ómir sapasyn saqtaýǵa múmkindik beredi. Qazirgi tańda VICh-ke shaldyqqan adamdar tolyqqandy ómir súrip, otbasyn quryp, bala tárbıeleýde.

- Bıyl VICh juqtyrǵan analardan 25 sábı dúnıege keldi. Olardyń eshqaısysynan ınfektsııa tirkelgen joq. Balalar bir jarym jyl boıy dáriger baqylaýynda bolady. Sońǵy birneshe jylda bizde VICh juqtyrǵan náresteler tirkelmegen, - dedi ortalyqtyń emdeý bóliminiń meńgerýshisi Natalıa Oralbaeva.

Eske salsaq, osyǵan deıin Ózbekstanda sheteldikter men mıgranttarǵa VICh-ke mindetti testileý engiziletindigi habarlanǵan.