Shyǵys Qazaqstan týrızmi tórt baǵytta damıdy

ASTANA. KAZINFORM – Shyǵys Qazaqstan oblysynda taý shańǵysyna arnalǵan jańa zamanaýı qonaqúıler salynady. Bul týraly ShQO Nurymbet Saqtaǵanov Astanada óńirdiń áleýmettik-ekonomıkalyq damýy týraly esebinde aıtty.

Ákimniń aıtýynsha, oblysta tórt negizgi klasterdi damytý áleýeti bar. Máselen, Katonqaraǵaıda wellness-týrızm, Marqakólde – ekologııalyq týrızm, Rıdderdegi – taý shańǵysy jáne Óskemende demalys kúnderi týrızmin ilgeriletýge bolady.

– Biz Rıdder mańynda jyl boıy jumys isteıtin «Anataý» keshenin salýdy josparlap otyrmyz, ol taý týrızmi men sportshylardy daıarlaý ortalyǵy bolady. Pana Asia halyqaralyq qonaqúı jelisi standarttarǵa tolyq saı keletin zamanaýı qonaqúıler salady, – dedi N. Saqtaǵanov Ortalyq kommýnıkatsııalar qyzmetinde.

Sonymen birge, óńirde medıtsınalyq týrızm qarqyndy damyp keledi. Onkologııa jáne hırýrgııa ortalyǵynda medıtsınalyq týrızm belsendi damyp, Check-up qyzmetteri kórsetilip turady.

Týrısterdi tartýǵa AltaiFest jáne «Shyǵys Salbýryny-2025» etnomádenı festıvali sııaqty ımıdjdik jobalar da yqpal etedi. Festıvalge Qazaqstannyń barlyq óńirinen, Reseı, Qytaı, Ispanııa, Vengrııa, Mońǵolııa jáne Qyrǵyzstannan 148 búrkitshi qatysqan jáne 10 myńnan astam kórermen jınalǵan.

Týrızmdi tabysty damytý úshin zamanaýı ınfraqurylym da mańyzdy. Oblysta eki jańa áýejaı salynyp jatyr, «Maıqapshaǵaı» jáne «Úbi» ótkizý pýnktteri, 5 temirjol vokzaly jańǵyrtylýda.

Sonymen birge, 856 shaqyrym jol jóndeldi. «Taldyqorǵan – Óskemen», «Óskemen-Semeı» jobalary aıaqtaldy, «Óskemen – Rahman qaınarlary» jobasy boıynsha jumystar júrgizilip jatyr.

Byltyrdan beri Óskemennen Máskeý men Novosıbırskige halyqaralyq áýe reısteri qatynaıdy. Kelesi jyldan bastap Qytaıǵa áýe reısin ashý josparlanyp otyr.

«Óskemen – Almaty» baǵytynda «Talgo» temirjol marshrýtyn iske qosýǵa daıyndyq júrip jatyr.

Aıta keteıik, Qazaqstannyń týrıstik qyzmetter eksporty jarty jylda 18% ósken.