Shyǵys Qazaqstan ormandaryn órtten «aqyldy munaralar» qorǵaıdy

ÓSKEMEN. KAZINFORM – Shyǵys Qazaqstan oblysynda bıylǵy jazda ormandarda órtti erte anyqtaıtyn júıe ornatyla bastaıdy.

Jyl basynan beri óńirdegi ormandarda 4 ret órt shyqqan. Jalyn 179 gektar aýmaqty sharpydy. Endi órtterdi tez anyqtap, sóndirip otyrý úshin arnaıy júıe iske qosylmaq.

Mamyr aıynda oblystaǵy toǵyz orman sharýashylyǵynda kameralar men datchıkter qoıylǵan munaralardy ornatý boıynsha pılottyq joba júzege asyryla bastaıdy. Olardyń ishinde Marqakól, Úlken Naryn, Altaı, Samar aýdandary bar.

- Bul munaralar tútindi birden baıqap, orman sharýashylyǵy dıspetcherlerine naqty ýaqyt rejıminde málimetterdi berip otyrady. Operator «Qazaqtelekom» AQ kelesi aıdan ormandardaǵy tıisti ýchaskelerdi bekitedi. Barynsha kóp aýmaq kórinetindeı jerdi tańdaý qajet, - dep habarlady ShQO Tabıǵı resýrstar jáne tabıǵat paıdalanýdy retteý basqarmasynan.

Jańa jabdyq kún batareıalarynan qýat alady. Bul ásirese kólikterdiń jetýi qıyn jáne elektr jelileri tartylmaǵan aımaqtar úshin asa mańyzdy.

Eske salsaq, osyǵan deıin ShQO Zaısan aýdanynda qamys órtengeni jaıly jazǵanbyz.