Shyǵys Qazaqstan oblysynyń qutqarýshylaryna jańa tehnıkalar tabystaldy
ASTANA. KAZINFORM — QR Tótenshe jaǵdaılar mınıstri Shyńǵys Árinov Shyǵys Qazaqstan oblysynyń qutqarý bólimshelerine jańa tehnıkanyń kiltterin tabys etti. Bul týraly vedomstvonyń baspasóz qyzmeti habarlady.
Óńirdiń kúrdeli relefi men klımattyq jaǵdaıynda qoldanýǵa arnalǵan órt sóndirý kólikteri, ótimdiligi joǵary jol talǵamaıtyn tehnıka, gıdrotsıklder jáne basqa da arnaıy jabdyqtar qutqarý qyzmetiniń ıeligine tústi.
— Qutqarýshylardyń jedel ári tıimdi jumys isteýi úshin zamanaýı tehnıkalyq quraldardyń bolýy óte mańyzdy. Bul bıylǵy jyly Shyǵys Qazaqstan oblysyna jańa tehnıkanyń ekinshi márte jetkizilýi. Bul óńirdiń materıaldyq-tehnıkalyq bazasyn edáýir nyǵaıtady, — dedi Shyńǵys Árinov.
Sonymen qatar is-shara barysynda mınıstr tótenshe jaǵdaılardyń aldyn alý baǵytyndaǵy tsıfrlyq jobalarmen tanysty. Oblysta týrısterdi QR-kod arqyly tirkeý júıesi engizildi. Kóshkin qaýpi bar aýmaqtarǵa monıtorıng júrgizilip, sondaı-aq kúshti áser etetin zattarmen yqtımal zalaldaný aımaqtary anyqtalyp jatyr.
Shara barasynda tótenshe jaǵdaılardyń aldyn alý jáne olardy joıý júıesin damytýǵa qosqan úlesi úshin birqatar mamandar men qoǵam belsendilerine alǵys hattar tabystaldy.
Aıta keteıik, Alataý polıgonynda órt sóndirgen qyzmetkerler marapattaldy.