Ýaqyt beldeýi. ShQO-dan bólek, ózge óńirlerde de jumys kestesi ózgerýi múmkin
ASTANA. KAZINFORM — Elimizde biryńǵaı ýaqyt beldeýi engizilgen soń shyǵys óńirdegi halyq bul bastamaǵa narazy ekenin bildirgen bolatyn. Qazirgi tańda Shyǵys Qazaqstan oblysynyń 7 aýdanynda jumys kestesi ózgertildi.
Bul týraly QR Saýda jáne ıntegratsııa mınıstri Arman Shaqqalıev aıtty.
— Májilistiń «Amanat» fraktsııasy aıasynda biryńǵaı ýaqyt máselesin talqylaý qorytyndysy boıynsha medıtsına, neıroǵylym, bıofızıka, genetıka, astrofızıka, fızıologııa salalaryndaǵy ǵylymı zertteý ınstıtýttary salalyq sarapshylarynyń, máslıhat depýtattary jáne múddeli tulǵalardyń qatysýymen biryńǵaı ýaqyt beldeýiniń halyq densaýlyǵyna, energııa tutyný jáne eńbek ónimdiligi áserine monıtorıng júrgizildi. Jumys barysynda ýaqyt beldeýi ózgerýine deıingi jáne odan keıingi kórsetkishterdi salystyratyn keshendi tásil qoldanyldy… Naqty derekterge negizdelgen nátıjeler ýaqyt beldeýiniń ózgerýi halyq ómiriniń negizgi kórsetkishterine teris áseri bolmaǵanyn aıqyndady, — dedi ol Úkimet otyrysynda.
Sonymen qatar spıker óńirlerde talqylaý barysynda máslıhat depýtattary jumys kestesin aýystyrý arqyly jumys ýaqytyn ońtaılandyrý jónindegi bastamany qoldaǵanyn atap ótti.
— Búgingi tańda, Shyǵys Qazaqstan oblysynyń birqatar aýdanynda (Katonqaraǵaı, Marqakól, Úlken Naryn, Zaısan, Tarbaǵataı, Samara, Kúrshim) turǵyndar tarapynan qoldaý taýyp, jumys kestesi 8:00–den 17:30 (keshki bes jarymǵa) deıin ózgertildi. Bul sharalar, azamattar úshin qolaıly jaǵdaı jasaýǵa, sondaı-aq kásibı jáne jeke ómir arasyndaǵy teńdikti jaqsartýǵa baǵyttalǵan. Qajet bolǵan jaǵdaıda, osyndaı tájirıbeni jergilikti atqarýshy organdar basqa óńirlerde de qoldanýǵa múmkindigi bar, — dedi mınıstr.
Osydan buryn Saýda jáne ıntegratsııa mınıstri Ǵalymdar ýaqyt beldeýin ózgertýdiń keri áserin dáleldese, kim jaýapty bolady degen saýalǵa jaýap bergen edi.
Budan bólek, Memleket basshysy Qasym-Jomart Toqaev «Ana tili» gazetine bergen suhbatynda biryńǵaı ýaqyt beldeýine qatysty suraqqa pikir bildirdi.