Shyǵys Qazaqstan oblysyndaǵy ortasha jalaqy – 305 myń teńge

Shyǵys Qazaqstan oblysynda jalpy óńirlik ónim 4,4 trln teńgege jetip, 3% ósimdi kórsetti. Bul týraly Shyǵys Qazaqstan oblysynyń ákimi Ermek Kósherbaev aıtty, dep habarlaıdy Kazinform.

Ermek Kósherbaev eseptik kezdesýin bastamas buryn Almaty qalasyndaǵy qaıǵyly habardan qaza bolǵandardyń týystaryna óz atynan jáne ShQO halqynyń atynan kóńil aıtty.

Ákimniń aıtýynsha, oblys halqy 728 myń adamǵa jetti, onyń 244 myńy nemese 34%-y aýylda turady. Jyl qorytyndysy boıynsha jalpy óńirlik ónim 4,4 trln teńgege jetip, 3% ósim baıqalǵan.

«Bıyl oblystyń áleýmettik-ekonomıkalyq damý kórsetkishterinde oń dınamıka bar. Ónerkásip óndirisiniń qarqyny 9%-ǵa, aýyl sharýashylyǵy 5%-ǵa, negizgi kapıtalǵa ınvestıtsııalar 7%-ǵa, bólshek taýar aınalymy 8%-ǵa artty. Jumyssyzdyq deńgeıi – 4,6%, munda 30 myńnan astam jumys orny quryldy. Onyń 23 myńy – turaqty oryndar. Ortasha aılyq jalaqy 18%-ǵa ósip, 305 myń teńgege jetti», - dedi E.Kósherbaev Ortalyq kommýnıkatsııalar qyzmetinde ótken baspasóz máslıhatynda.

Jyl basynan beri memlekettik bıýdjetke 420 mlrd teńge salyq tústi. Onyń ishinde respýblıkalyq bıýdjetke – 263,2, jergilikti bıýdjetke 156,3 mlrd teńge baǵyttalǵan.

«Bıylǵy oblys bıýdjeti 496,4 mlrd teńge boldy, onyń ishinde menshikti kirister – 166,6 (34%), transfertter men sýbventsııalar – 323,2 mlrd teńge (66%). Bizdiń aımaq sýbventsııalyq bolyp sanalady. Bıýdjet shyǵystarynyń jartysy áleýmettik salaǵa - 243,4 mlrd teńge, onyń ishinde bilim berý – 168, densaýlyq saqtaý – 26,3, áleýmettik qamsyzdandyrý – 27,5, mádenıet, sport salalaryna – 21,7 mlrd teńge kózdelgen», - deıdi oblys ákimi.

Sonymen birge, aıtarlyqtaı qarajat agroónerkásiptik keshenge – 36,1 mlrd teńge jáne ınfraqurylymdy damytýǵa (joldar, turǵyn úı, sýmen jabdyqtaý, jylý) 69,2 mlrd teńge (14%) baǵyttalmaq.