Shyǵys Qazaqstan oblysyndaǵy mektepterde 132 muǵalim jetispeıdi
ÓSKEMEN. KAZINFORM – Shyǵys Qazaqstan oblysyndaǵy mektepterde 132 muǵalim tapshy.
Oblystyń bilim ordalarynda keıbir pánderden muǵalim tapshylyǵy sezilýde. Bul týraly Óskemendegi Aqparat ortalyǵynda ótken baspasóz máslıhatynda ShQO Bilim basqarmasynyń basshysy Innesa Chernysheva málim etti.
«Jalpy bilim beretin mektepterde orys tilinde oqytatyn bastaýysh synyp muǵalimderi, matematıka, orys tili men ádebıeti pánderiniń muǵalimderi jetispeıdi. Osy pánderdi oqytatyn 132 muǵalim qajet», - dedi ol.
Muǵalim tapshylyǵy ásirese Altaı, Samar, Shemonaıha aýdandary men Rıdder qalasynda sezilip otyr.
«Ótken oqý jylynda bul másele mobıldi jáne onlaın sabaq beretin muǵalimderge arnalǵan mehanızmdi engizý arqyly sheshildi. Bul tájirıbe jańa oqý jylynda da jalǵasyn tabady», - dedi Innesa Chernysheva.
Aıta keteıik, jańa oqý jylynda óńir mektepterinde jalpy sany 12 myń muǵalim jumysqa kirisedi.
