Shyǵys Qazaqstan oblysyndaǵy qurylys jumystary qatań baqylaýǵa alyndy
ÓSKEMEN. KAZINFORM — Shyǵys Qazaqstan oblysynda qurylys nysandaryndaǵy tekserýler sany 40%-ǵa artyp, zańbuzýshylyqtar úshin salynǵan aıyppul kólemi 180 mıllıon teńgege taıady.
Óńirlik kommýnıkatsııalar qyzmetinde ótken brıfıngte Shyǵys Qazaqstan oblysynyń memlekettik sáýlet-qurylys baqylaý basqarmasy basshysynyń orynbasary Samat Qaıyrdınov baqylaýdyń kúsheıtilgenin málimdedi. Oǵan qurylysshylar tarapynan jyldan-jylǵa júıeli buzýshylyqtar sebep bolǵanyn aıtty.
— Biz jobalyq sheshimderden aýytqý, ruqsatsyz jumys jáne merzimderdi ótkizip alý syndy qaıtalanatyn máselelerdi baıqadyq. Sondyqtan baqylaýdy kúsheıtýge týra keldi, — dedi Samat Qaıyrdınov.
Byltyr basqarma tarapynan 240 tekserý júrgizilgen. Nátıjesinde 181 uıǵarym shyǵarylyp, 691 ákimshilik is qozǵaldy, bul ótken jylmen salystyrǵanda aıtarlyqtaı kóp. Sondaı-aq jeke turǵyn úı qurylysyna basty nazar aýdaryldy.
Qazir Óskemende 36 turǵyn úı kesheniniń qurylysy júrip jatyr. Buǵan deıin birneshe nysanda jospardan tys tekserýler júrgizilip, 8 merdiger kompanııa ákimshilik jaýapkershilikke tartylǵan.
Problemalyq jobalarǵa erekshe kóńil bólinip otyr. Emeralds turǵyn úı keshenindegi jaǵdaı kúrdeli másele kúıinde qalyp otyr: úleskerlerge keltirilgen shyǵyn 1,8 mıllıard teńgeden asty, qurylystyń aıaqtalýy nebári 35 paıyz.
— Bul turǵyn úı kesheniniń máselesi vedomstvoaralyq baqylaýda. Qurylysty aıaqtaýdyń barlyq múmkin tetikteri qarastyrylyp jatyr, — dedi Qaıyrdınov.
«Astoria» turǵyn úı kesheni oń serpin kórsetip otyr. Qurylys qaıta bastalyp, ǵımarattyń qańqasy turǵyzylyp jatyr. Qurylys jumystary 2026 jyldyń ekinshi toqsanynda aıaqtalady dep josparlanǵan.
Sonymen qatar lıtsenzııalaýdy baqylaý kúsheıtildi. 2025 jyly 156 ákimshilik is qozǵaldy, 11 lıtsenzııanyń qoldanylýy jáne taǵy 7-ýi toqtatyldy.
Basqarma aldaǵy jyldary qosymsha baqylaý quraldary engiziletinin atap ótti. Qazaqstanda 2026 jyldyń 1 shildesinen bastap jańa Qurylys kodeksi kúshine enedi. Ol tsıfrlyq regıstrlerdi, jobany jaqsartýdy qarastyrady jáne qurylystyń negizgi quramdas bólikterine 10 jylǵa deıingi kepildik merzimin beredi.
— Bizdiń maqsatymyz — problemalyq jobalardyń sanyn azaıtyp, qurylys naryǵyn halyq úshin ashyq ári túsinikti etý, — dep túıindedi Samat Qaıyrdınov.
Aıta keteıik, Almatyda áýejaı mańyndaǵy turǵyn úı qurylysy toqtatyldy.