Shyǵys Qazaqstan oblysynda jastar arasyndaǵy jumyssyzdyq artqan
ASTANA. KAZINFORM — Úkimette Premer-mınıstrdiń orynbasary — mádenıet jáne aqparat mınıstri Aıda Balaevanyń tóraǵalyǵymen Shyǵys Qazaqstan oblysynyń áleýmettik salasyn damytý máseleleri boıynsha kezdesý ótti, dep habarlaıdy Úkimettiń baspasóz qyzmeti.
Jıynǵa salalyq mınıstrlikterdiń basshylary men ókilderi, sondaı-aq oblys ákimi Nurymbet Saqtaǵanov qatysty.
— Otyrys barysynda óńirdiń densaýlyq saqtaý salasynda halyq densaýlyǵynyń jekelegen kórsetkishteri boıynsha oń ózgerister baıqalǵany atap ótildi. Shyǵys Qazaqstan oblysy — 2025 jyly ana ólimi tirkelmegen sanaýly óńirlerdiń biri. Sonymen birge medıtsına mamandary tapshylyǵyna baılanysty júıeli máselelerdiń bar ekeni jáne bir jastaǵy balalardy vaktsınatsııalaý kórsetkishi boıynsha óńirde belgilengen meje oryndalmaǵany aıtyldy, — delingen habarlamada.
Oblysta ǵylymdy damytý máselesine de erekshe nazar aýdaryldy. Bul sala boıynsha naqty nátıjeler bar. Atap aıtqanda, 664 ǵylymı jumys jarııalanyp, 67 ázirleme óndiriske engizilgen. Óńirde óńdeý ónerkásibine arnalǵan kobaltsyz qatty qorytpalar ázirlenýde, sondaı-aq travmatologııa men ortopedııada qoldanylyp jatqan 20-dan astam medıtsınalyq ımplantat túri jasalady.
Sonymen qatar oblysta orta bilim berý sapasyn arttyrý baǵytyndaǵy jumysty kúsheıtý qajettigi atap ótildi. Óńirde qosymsha nazar aýdarýdy talap etetin negizgi baǵyttar aıqyndaldy. Máselen, oqýshylardyń oqý saýattylyǵyn, matematıka jáne jaratylystaný-ǵylymı baǵyt boıynsha saýattylyǵyn júıeli túrde damytý jumystaryn kúsheıtý qajettigi kórsetildi.
Eńbek jáne halyqty áleýmettik qorǵaý mınıstrligi jelisi boıynsha óńirde jumyssyzdar sany, onyń ishinde jastar arasyndaǵy jumyssyzdyqtyń artqany baıqalady. Vedomstvo derekterine sáıkes, óndiristik jaraqattaný máselelerine de aıryqsha ózekti.
Óńirde týrıstik ınfraqurylymdy, navıgatsııa men salany aqparattyq qoldaýdy, sondaı-aq ınklıýzıvti sportty damytý qosymsha nazar aýdarýdy qajet etedi.
Jıyn qorytyndysy boıynsha Aıda Balaeva áleýmettik salada kórsetiletin qyzmetterdiń sapasyn arttyrý, halyq arasynda aqparattyq-túsindirý jumystaryn kúsheıtý jáne vedomstvoaralyq ózara is-qımyldy jolǵa qoıý jóninde tıisti tapsyrmalar berdi.
Osyǵan deıin QR Premer-mınıstriniń orynbasary – mádenıet jáne aqparat mınıstri Aıda Balaeva jańa Konstıtýtsııa jobasyn talqylaý barysynda elde qalyptasqan jaǵdaı týraly turǵyndarǵa eskertý jasady.