Shyǵys Qazaqstan oblysynda úsh úlken kanaldy rekonstrýktsııalaý josparlanyp otyr
ÓSKEMEN. KAZINFORM - Shyǵys Qazaqstan oblysy boıynsha «Qazsýshar» fılıaly Kúrshim jáne Marqakól aýdandarynda Jaýǵashty, Qaraqııa jáne Pobeda magıstraldy kanaldaryn rekonstrýktsııalaýdy josparlap otyr. Bul týraly Óńirlik kommýnıkatsııalar qyzmetiniń alańynda fılıal dırektory Nurjan Ámirjanov málimdedi.
Búgingi tańda úsh nysan boıynsha jobalyq-smetalyq qujattama ázirlenip jatyr. Qujattardy ázirleý jumysyn osy jyldyń sońyna deıin aıaqtaý josparlanýda. Búgingi tańda topografııalyq túsirilim, geologııalyq jáne geodezııalyq is-sharalar aıaqtaldy.
Sondaı-aq, Zaısan aýdanynyń Úıdene sýarý júıesiniń eki magıstraldy kanalynda avtomattandyrý júıesin qalpyna keltirý jumystary aıaqtaldy.
Budan bólek, bıyl kanaldar arqyly sý berý sapasyn jaqsartý úshin Zaısan aýdanyndaǵy Qaratoǵam magıstraldy kanalynda sý kólemin esepteýge arnalǵan sý beketin qalpyna keltirý kózdelgen.
«Bıyl Shyǵys Qazaqstan oblysy boıynsha «Qazsýshar» fılıaly Kúrshim, Zaısan jáne Tarbaǵataı aýdandarynyń 43 shaqyrym kanalyn mehanıkalyq tazartý jumysyn júrgizdi. Jyl basynan beri fılıal kanaldar arqyly 9140 ga sýarmaly jerge 36,7 mln tekshe metr sý berdi. Ol úshin sharýalarmen 556-dan astam kelisimshart jasaldy», - dedi Shyǵys Qazaqstan oblysy boıynsha «Qazsýshar» fılıalynyń dırektory Nurjan Ámirjanov.
