Shyǵys Qazaqstan oblysynda ishimdikten bas tartqan aýyldar sany 24-ke jetti

ÓSKEMEN. KAZINFORM – ShQO-daǵy 24 aýyldyń turǵyndary araqtan túbegeıli bas tartty. 

ShQO polıtsııa departamenti baspasóz qyzmetiniń málimetine súıensek, Kúrshim aýdanyndaǵy Amanat aýyly «Zań men tártipti ustanatyn eldi meken» bastamasyna qosyldy.

– Bul sheshimdi jınalysta aýyl turǵyndary qabyldaǵan. Amanattyqtar osy bastama tyıym salýǵa emes, sanaly tańdaý jasaýǵa negizdelgenin atap ótti. Negizgi maqsat – otbasyndaǵy tynyshtyqty saqtaý jáne balalardyń jarqyn bolashaǵyn qamtamasyz etý, - delingen aqparatta.

Búginde Amanat aýylynda 213 adam turady. Mektepte 28 oqýshy bilim alady.

Vedomtsvo dereginshe, óńirdegi quqyq buzýshylyqtardyń basym bóligi mas kúıde jasalatyndyqtan mundaı bastamalardyń aldyn alý sharalary turǵysynan mańyzy zor.

Aıta keteıik, osylaısha Shyǵys Qazaqstandaǵy ishimdikten bas tartqan aýyldar sany 24-ke jetti. 

Eske salsaq, buǵan deıin Qostanaı oblysynda bir aýyldyń turǵyndary ishimdikten bas tartqany habarlanǵan.