Shyǵys Qazaqstan oblysynda meıirim aktsııasy ótti
ÓSKEMEN. KAZINFORM – Shyǵys Qazaqstan oblysynda 1 naýryz – Alǵys aıtý kúninde qarttar men múmkindigi shekteýli jandarǵa kómek kórsetý úshin meıirim aktsııasy ótti.
ShQO boıynsha qylmystyq-atqarý júıesi mekemeleriniń qyzmetkerleri merekede jalǵyzbasty zeınetkerlerge kómektestti. Olar «Meıirim – bul jaı ǵana sóz emes, ómir salty» uranymen qarttardyń aýlasyn qardan tazartty.
«Qart adamdar mundaı kómekke muqtaj, óıtkeni kóbine qozǵalý qıyn. Al ótken aptada Shemonaıha aýdanynda jáne Óskemen qalasynda jaýǵan qalyń qardan úıden shyǵýdyń ózi aýyr», - deıdi №18 túzetý mekemesiniń jasaq bastyǵy Jánibek Muqash.
Mekeme qyzmetkerleri aýlalar men kóshelerdegi qar basqan joldardy da tazalaǵan. Meıirim aktsııasynan qutqarýshylar da qalys qalmady. Tarbaǵataı aýdany Tuǵyl aýylyna qarasty №16 órt sóndirý bóliminiń komandıri Serik Aıtqalı Álı esimdi balasymen birge Rybatskaıa kóshesiniń turǵyndaryna aýla tazalaýǵa qolushyn sozdy. Al Rıdder qalasynyń № mamandandyrylǵan órt sóndirý bólimshesiniń júrgizýshisi Ashat Smaǵulov Nurjigit esimdi ulymen tize qosyp, erekshe qajettiligi bar turǵyndarǵa qar kúrep kómektesti.
«Oblys aýdandary men qalalaryndaǵy barlyq qyzmetkerimiz osyndaı sharalardan shet qalmaıdy. Qutqarýshylarymyz osyndaı áreketterimen keleshek urpaqty eńbekke baýlı otyryp, aǵa býynǵa syılastyq jasaýǵa úıretedi», - dedi ShQO TJD bastyǵy Erǵalı Bahaev.
Atalǵan is-shara Shemonaıha qalasynda da jalǵasyn taýyp, №28 órt sóndirý bóliminiń aǵa órt sóndirýshisi Qanat Bıjanov bes jasar ulymen birge jalǵyz turatyn qart ananyń aýlasyn tazalap berdi.
Altaı aýdanyna qarasty Oktıabrskıı kentiniń №20 órt sóndirý bóliminiń bastyǵy Rıshat Nurahmetov balalarymen birge qamqorlyqqa muqtaj áıelge kómektesti.
