Shyǵys Qazaqstan oblysynda balalarǵa ekpe salý kórsetkishi tómendedi
ASTANA. KAZINFORM – Shyǵys Qazaqstan oblysynda keıbir josparly ekpelermen qamtylǵan balalardyń úlesi 50 paıyzǵa da jetpegen. Sanıtarııalyq dárigerler munyń sebepteriniń biri retinde maýsymdyq sýyq tııý aýrýlary men sábılerge qyzylshaǵa qarsy qosymsha vaktsına salý naýqanyn atady, dep habarlaıdy Kazinform tilshisi.
Jańa týǵan náresteler arasynda vaktsınatsııa kórsetkishi 90 paıyzdan assa, bir jasqa deıingi balalarǵa arnalǵan jekelegen ekpeler boıynsha bul kórsetkish 50 paıyzǵa da jetpeıdi. Immýndaý statıstıkasy men ekpe kúntizbesinen aýytqý sebepteri Óńirlik kommýnıkatsııalar qyzmetinde ótken brıfıngte aıtyldy.
Osy jyldyń toǵyz aıynda vaktsınatsııamen qamtý deńgeıi jańa týǵan náresteler arasynda eń joǵary boldy. Sábılerdiń 96 paıyzyna týberkýlezge qarsy BTsJ ekpesi, al 93,3 paıyzyna V gepatıtine qarsy vaktsına salynǵan.
Bir jasqa deıingi balalar arasynda AKDS jáne Hib vaktsınalarynyń úshinshi dozasyn alýǵa tıis balalardyń 49,8 paıyzy ǵana ekpe alǵan. Pnevmokokk ınfektsııasyna qarsy vaktsınanyń ekinshi dozasymen qamtý kórsetkishi de shamalas – 49,5 paıyz.
Bir jastaǵy balalardyń 60,2 paıyzy qyzylshaǵa, qyzamyqqa jáne epıdemııalyq parotıtke qarsy biriktirilgen vaktsınanyń (QQP) birinshi dozasyn alǵan. Al osy jastaǵy balalardyń tek 36,7 paıyzyna AKDS jáne Hib vaktsınalarynyń tórtinshi dozasy salynǵan.
– Vaktsınatsııamen qamtý kórsetkishine, ásirese pnevmokokk ınfektsııasyna qarsy ekpeler boıynsha, maýsymdyq faktor tikeleı áser etti. Kúzdiń kelýimen sýyq tııý aýrýlaryna baılanysty ekpege ýaqytsha medıtsınalyq qarsy kórsetilimder sany dástúrli túrde artty. Sonymen qatar 6–11 aılyq sábılerge qyzylshaǵa qarsy qosymsha jappaı ımmýndaý júrgizilýine baılanysty ekpe kestesine túzetýler engizildi, – dep túsindirdi Shyǵys Qazaqstan oblysynyń sanıtarııalyq-epıdemıologııalyq baqylaý departamenti basshysynyń orynbasary Sáýle Slıamǵazına.
Salalyq vedomstvonyń málimetinshe, Ulttyq egý kúntizbesinde kózdelgen barlyq vaktsına tirkelgen jeri boıynsha emhanalarda tegin salynady.
2026 jyldyń toǵyz aıynda óńirde ımmýndaýdan keıingi qolaısyz kórinisterdiń, sonyń ishinde aýyr allergııalyq reaktsııalardyń birde-bir jaǵdaıy tirkelmegen.
Epıdemıologter ata-analardy medıtsınalyq negizsiz josparly ekpelerdi keıinge qaldyrmaýǵa shaqyrady. Mamandar vaktsınatsııany ýaqytyly júrgizý ujymdyq ımmýnıtettiń qalyptasýyna yqpal etip, juqpaly aýrýlardyń órshý qaýpin tómendetetinin eske salady.
Aıta keteıik, buǵan deıin Jambyl oblysynda bıylǵy segiz aıda 564 adam qyzylsha juqtyrǵany, olardyń 445-i 14 jasqa deıingi balalar ekeni habarlanǵan. Aýrýǵa shaldyqqandardyń 63 paıyzdan astamy vaktsına almaǵan.
