Shyǵys Qazaqstan oblysynda 130-dan astam qoqys úıindisi anyqtaldy
ÓSKEMEN. KAZINFORM — Shyǵys Qazaqstan oblysynda «Taza Qazaqstan» aktsııasy aıasynda bıyl 6 myńnan astam quqyqbuzýshylyq anyqtaldy.
ShQO polıtsııa departamenti baspasóz qyzmetiniń málimetinshe, óńir polıtseıleri jergilikti atqarýshy organdarmen birlesip, abattandyrý qaǵıdalarynyń saqtalýyn baqylaý jáne qorshaǵan ortany lastaý derekterin anyqtaý maqsatynda kún saıyn reıdter ótkizip keledi.
— Búginde óńirde 16 mobıldi top jumys isteıdi. Olardyń jumysynyń nátıjesinde 6 195 ákimshilik quqyqbuzýshylyq, onyń ishinde 5 057 — abattandyrý qaǵıdalaryn buzý, 1 138 — ortaq paıdalanylatyn oryndardy lastaý deregi anyqtaldy, — delingen habarlamada.
Budan bólek, bıyl 133 zańsyz qoqys úıindisi anyqtalyp, olardyń 108-i joıyldy. Qalǵan úıindilerdi joıý jumystary jalǵasyp jatyr.
— Quqyqbuzýshylyqtardyń aldyn alý maqsatynda jergilikti atqarýshy organdar men zańdy tulǵalardyń atyna olardyń týyndaýyna yqpal etetin sebepter men jaǵdaılardy joıý týraly 80 usynys engizildi. Osy rette, óńir turǵyndaryn qorshaǵan ortaǵa uqypty qarap, abattandyrý qaǵıdalaryn saqtaýǵa shaqyramyz. Óńir tazalyǵy — ár azamattyń jaýapkershiligi, — delingen aqparatta.
Eske salaıyq, osyǵan deıin Astanada abattandyrý qaǵıdalaryn buzǵan 27 myńnan astam adamǵa aıyppul salynǵany habarlanǵan edi.
