Shyǵys Qazaqstan oblysy kartasynan eki aýyl joıylýy múmkin

ÓSKEMEN. KAZINFORM — Shyǵys Qazaqstanda turǵyndary az eki eldi meken — Katonqaraǵaı aýdanyndaǵy Shubaraǵash jáne Úlken Naryn aýdanyndaǵy Qundyzdy aýyldaryn taratý máselesi qarastyrylyp jatyr.

Mundaı sheshim jobasy oblystyq máslıhattyń saıtynda jarııalanǵan.

Qujatqa sáıkes, Shubaraǵash aýylyn Jambyl aýylyna, al Qundyzdyny Novohaırýzovka aýylyna qosý usynylyp otyr. Sebebi — turǵyn sanynyń azaıýy jáne áleýmettik ınfraqurylymnyń bolmaýy.

Jergilikti turǵyndar mundaı sheshimniń kútilgenin aıtady.

— Buryn halyq kóp bolatyn, mektep, ferma jumys istedi. Qazir birneshe adam ǵana qaldy, negizinen olardyń deni úlkender. Kúnkóris qıyndady, dúken joq, qysta joldy qar basyp qalady, — dedi aýyl turǵyndary.

Katonqaraǵaı aýdany ákimdiginde eldi mekender mártebesin joıý ondaǵy turǵyndardyń jaǵdaıyn nasharlatpaıtynyn túsindirdi.

— Úlken aýyldardyń quramyna qosylý turǵyndarǵa mektep, feldsherlik pýnkt, dúken, jol sııaqty áleýmettik nysandardy paıdalanýǵa múmkindik beredi. Bul — halyqqa kórsetiletin qyzmetterdi ońtaılandyrýǵa jáne jaqsartýǵa baǵyttalǵan ákimshilik shara, — dep habarlandy aýdan ákimdiginen.

Aýyldardy taratý týraly másele turǵyndarmen bolatyn talqylaýdan keıin oblystyq máslıhattyń aldaǵy sessııasynda qaralmaq.

Aıta keteıik, buǵan deıin Shyǵys Qazaqstanda taǵy 30 aýyldyń joıylýy múmkin ekeni habarlanǵan. Onyń beseýi qazirdiń ózinde taratylǵan.

Sondaı-aq osy oblysta bolashaǵy joq birneshe aýyl kartadan joıylǵanyn jazǵanbyz.