Shyǵys Qazaqstan oblysy ákiminiń birinshi orynbasary taǵaıyndaldy
ASTANA. KAZINFORM — Shyǵys Qazaqstan oblysy ákiminiń ókimimen Darhan Baqytjanuly Sapanov oblys ákiminiń birinshi orynbasary bolyp taǵaıyndaldy.
Darhan Sapanov 1985 jyly 2 qańtarda Shyǵys Qazaqstan oblysy Tarbaǵataı aýdanynyń Aqjar aýylynda dúnıege kelgen.
Joǵary bilimdi birneshe oqý ornynda alǵan. 2007 jyly D. Serikbaev atyndaǵy Shyǵys Qazaqstan memlekettik tehnıkalyq ýnıversıtetin «Ónerkásiptik jylý energetıkasy» mamandyǵy boıynsha ınjener biliktiligimen támamdaǵan. 2009 jyly S. Amanjolov atyndaǵy Shyǵys Qazaqstan memlekettik ýnıversıtetin «Menedjment» mamandyǵy boıynsha támamdaǵan. 2022 jyly Reseı Federatsııasy Prezıdenti janyndaǵy Reseı halyq sharýashylyǵy jáne memlekettik qyzmet akademııasynda «Іskerlik ákimshilendirý doktory» (DBA) baǵdarlamasyn aıaqtaǵan.
Eńbek jolyn 2007 jyly bastaǵan. Ár jyldary Shyǵys Qazaqstan oblysynyń Memlekettik sáýlet-qurylys baqylaýy departamentiniń ınspektsııalaý bóliminiń bas mamany, «Astanaenergosbyt» JShS-niń halyqpen jumys isteý departamentiniń ınjeneri, Qazaqstan Respýblıkasy Energetıka jáne mıneraldyq resýrstar mınıstrliginiń Elektr energetıkasy jáne kómir ónerkásibin damytý departamentiniń sarapshysy qyzmetterin atqarǵan.
2009-2020 jyldary Qazaqstan Respýblıkasy Premer-mınıstri keńsesinde ár túrli laýazymdarda eńbek etti. Atap aıtqanda, bas sarapshy, bas konsýltant, sektor meńgerýshisi, bas ınspektor jáne Indýstrııalyq-ınnovatsııalyq damý bólimi meńgerýshisiniń orynbasary qyzmetterin atqarǵan.
2020-2023 jyldary Qazaqstan Respýblıkasy Prezıdenti Ákimshiliginiń memlekettik ınspektory boldy.
2023 jylǵy aqpan aıynan bastap Shyǵys Qazaqstan oblysy ákiminiń orynbasary qyzmetin atqaryp keldi.
Memlekettik qyzmet salasyndaǵy eńbegi úshin 2018 jyly «Eren eńbegi úshin» memlekettik medalimen marapattalǵan.
Eske salaıyq, buǵan deıin Saıan Muratuly Balqash qalasynyń ákimi bolyp taǵaıyndalǵanyn habarlaǵanbyz.
