Shyǵys Qazaqstan men Abaı oblystaryndaǵy elektr jelileriniń 97 paıyzy tozǵan
ÓSKEMEN. KAZINFORM – Shyǵys Qazaqstan men Abaı oblystary elektr jelileriniń tozýy boıynsha Qazaqstandaǵy eń aldyńǵy sheptegi óńirler. Respýblıka boıynsha tozý deńgeıi orta eseppen 62 paıyzdy qurasa, bul eki oblysta jyl basyndaǵy kórsetkish 97 paıyzǵa jetken.
Eki birdeı oblystaǵy elektr jelilerine «Birikken Energoservıstik kompanııa» qyzmet kórsetedi. Dál osy kompanııanyń jelileri 97%-ǵa tozǵan. Odan keıingi orynda 95 paıyzben Qaraǵandy oblysy jáne 93 paıyzben Almaty oblysy tur. Sondyqtan eldegi energetıkalyq kompanııalar bıyl kúsh-jigerin jabdyqtardy jańǵyrtýǵa barynsha jumyldyrdy. Biraq jaǵdaı áli kúnge deıin ońalmaı keledi.
Shyǵys Qazaqstan men Abaı oblystarynda jyl basynan beri elektr jelilerinde 1300-den astam apat bolǵan. «Birikken Energoservıstik kompanııa» AQ málimetinshe, shalǵaı eldi mekenderdegi másele óte ótkir. Máselen, Jarma aýdanyna qarasty Úshbıik aýylynyń turǵyndary 10 jyldan beri jergilikti bılikten kómek surap keledi.
«Jaryqtyń bolý-bolmaýy bizde tikeleı aýa raıyna baılanysty. Eger jel kúsheıse, jaryq óshedi degen sóz. Tozǵan jeliler aýystyrýdy qajet etedi», - deıdi Úshbıik aýylynyń turǵyny Tóleýbek Ahmetjanov.
Aýylda jóndeý jumystary múlde júrgizilmeıdi dep aıtýǵa bolmas. Ár úzilgen jeli qalpyna keltiriledi, jabdyqtar aýystyrylady. Biraq halyq jańa jabdyqtar alynbaıtyndyǵyna narazy.
Jarma aýdanynyń ákimdigi kómektese almaıdy. Olar tek aqaýlardy joıýǵa járdemdesedi, óıtkeni jeliler jeke kompanııanyń balansynda. Al energetıkalyq kompanııa bolsa másele baryn jasyrmady.
«2024 jyly jabdyqtardy jańǵyrtý men kúrdeli jóndeýge rekordtyq 15 mıllıard 148 mıllıon 794 myń teńge ınvestıtsııaladyq. Biz jalpy uzyndyǵy 102 shaqyrymnan asatyn 28 nysandaǵy jelilerdi qalpyna keltirdik. Al quny 1,5 mlrd teńgeni quraıtyn joba áli de jalǵasýda. Sondaı-aq 67 nysanda qosalqy stantsııalardaǵy jabdyqtar aýystyryldy. Osy atqarylǵan jumystardyń nátıjesinde tozýdy 84,4%-ǵa deıin tómendete aldyq», - dep habarlady «Birikken Energoservıstik kompanııa» AQ-dan.
Jaǵdaıdy ózgertý úshin Úkimet energetıkalyq jáne kommýnaldyq ınfraqurylymdy jańǵyrtýdyń 2030 jylǵa deıingi ulttyq jobasyn qabyldady. Qazaqstanda 6 jyl ishinde jelilerdi jańartýǵa 3,2 trln teńge bólinedi dep kútilip otyr. Bul tozýdy orta eseppen 39 paıyzǵa azaıtpaq.
Eske salsaq, osyǵan deıin Úkimette jańartylatyn energetıka, sýdy tuşytý jáne «jasyl» sýtegi óndirý máseleleri talqylanǵany habarlanǵan.
