Shyǵys Qazaqstan men Abaı oblystarynda elektr energııasynyń tarıfi ózgerdi

ÓSKEMEN. KAZINFORM – Shyǵys Qazaqstan jáne Abaı oblystarynda elektr energııasyna jańa tarıfi osy aptadan bastap kúshine endi. 

Bul týraly eki óńirge qyzmet kórsetetin «Birikken EnergoServıs Kompanııasy» AQ málimdedi. 

Kompanııanyń resmı saıtynda jarııalanǵan aqparatqa sáıkes, tarıfti kóterý týraly sheshim Ulttyq ekonomıka mınıstrligine qarasty Tabıǵı monopolııalardy retteý komıteti ShQO boıynsha departamentiniń qorytyndysy negizinde qabyldanǵan. Tarıfterdiń ósýi kóterme naryqtaǵy baǵanyń qymbattaýyna baılanysty bolyp otyr. 

Jańa tarıf mólsherleri (QQS-syz):

- Turmystyq tutynýshylar úshin — 19,332 teńge kVt/saǵ;
- Ózge tutynýshylar úshin — 34,877 teńge kVt/saǵ;
- Áleýmettik mańyzy bar azyq-túlik taýarlaryn óndirýshilerge — 31,583 teńge kVt/saǵ;
- Bıýdjettik uıymdarǵa — 61,084 teńge kVt/saǵ.

Sonymen qatar halyq úshin burynǵydaı dıfferentsıaldy tarıf júıesi saqtalady. Tarıf mólsheri tutyný kólemine, elektr plıtasynyń bolýyna, úıdiń gazben qamtylý jaǵdaıyna jáne áleýmettik mártebege baılanysty ózgeredi. Máselen, zeınetkerler men múmkindigi shekteýli jandar úshin alǵashqy 120 kVt/saǵ kólemindegi tutynýǵa belgilengen tarıf 16,666-17,062 teńge aralyǵynda.

Eske salsaq, osyǵan deıin qytaılyq kompanııa Shıelide kún elektr stantsııasyn salyp jatqany habarlanǵan.