Shyǵys Qazaqstan kósheleri men joldary tolassyz jaýǵan qardan tazalanyp jatyr
ÓSKEMEN. KAZINFORM – Shyǵys Qazaqstan oblysynda bir kúnde qalyń qar jaýyp tastady.
Tańerteń «Shemonaıha-Sekısovka» jol ýchaskesinde júk kólikteri men avtobýstardyń qozǵalysyna shekteý qoıyldy. Aımaqtyń ózge joldary tún ishinde tazalanyp, qaıta ashyldy. Dese de qutqarýshylarǵa birqatar jaǵdaılarǵa jedel áreket etýge týra keldi. Ulan aýdany Saǵyr aýylynan on shaqyrym jerde er adam kóligimen qar qursaýynda qalyp qoıǵan.
- Qutqarýshylar ótimdiligi joǵary tehnıkamen oqıǵa ornyna jetip, er adamdy evakýatsııalap, Óskemen qalasyna jetkizdi. Oǵan medıtsınalyq kómek qajet bolǵan joq, - dep habarlady ShQO TJD baspasóz qyzmetinen.
Qutqarýshylar aýa raıy jaǵdaıy nasharlaǵan kezde qaýipsizdik sharalaryn saqtaý qajettigin eske saldy.
- Azamattardy saqtyq tanytyp, aýa raıy nasharlaǵan sátte eldi mekenderden shyqpaýǵa shaqyramyz, - delingen aqparatta.
Al Óskemenniń ózinde kommýnaldyq qyzmetter táýlik boıy jumys istep jatyr. Qala kóshelerinde traktorlar, avtogreıderler, tıegishter jáne basqa da jol tazalaý tehnıkalary jumyldyrylǵan. Merdiger uıymdar kúsheıtilgen rejımge kóship, magıstraldar, aıaldamalar men jaıaý júrginshiler aımaqtary tazalanýda.
- Aıaq astynan qys bastaldy. Bir kúnde qalany qar basty. Biz úzdiksiz jumys isteýdemiz. Aıaldamalar men trotýarlardy qardan ashyp jatyrmyz. Tehnıkalar da bir toqtamaıdy, - deıdi «Taza Óskemen» kommýnaldyq kásipornynyń qyzmetkeri Boranbaı Ádiletbek.
Kommýnaldyq qyzmetkerlerge eriktiler de qoldaý kórsetip jatyr. «Meıirimdi Shyǵys» aktsııasy aıasynda olar túnde jumysshylarǵa ystyq shaı taratty.
- Qalany kúndiz-túni qardan tazartyp jatqan jandarǵa kómektesý - bizdiń ortaq mindetimiz», - dedi shtab ókilderi.
Tótenshe jaǵdaı týyndaǵan jaǵdaıda turǵyndarǵa 112 nómirine habarlasý qajettigi eskertildi.
Eske salsaq, osyǵan deıin Abaı oblysynda aýa raıynyń nasharlaýyna baılanysty eskertý jarııalanǵany habarlanǵan.