Shyǵys Qazaqstan aýmaǵynyń 85 paıyzyn áli qar alyp jatyr
ÓSKEMEN. KAZINFORM – Shyǵys Qazaqstan oblysynda sý tasqyny qaýpi bar ýchaskelerge áýeden barlaý júrgizildi.
ShQO tótenshe jaǵdaılar departamenti baspasóz qyzmetiniń málimetine súıensek, óńir boıynsha qazirgi sý tasqyny jaǵdaıyn baǵalaý maqsatynda Úlken-Naryn, Marqakól, Zaısan jáne Tarbaǵataı aýdandarynyń aýmaqtaryna áýeden sholý júrgizildi.
- Zertteý nátıjeleri boıynsha óńir aýmaǵynyń shamamen 85%-yn qar jamylǵysy alyp jatqany anyqtaldy. Tómengi jáne ońtústik aýdandarda qar jamylǵysy joq, qardyń negizgi qory taýly aımaqtarda shoǵyrlanǵan. Áýeden sholý barysynda Marqakól aýdanyndaǵy Orta-Terekti sý qoımasynyń bógeti tekserildi. Onda tótenshe jaǵdaıdyń týyndaý qaýpi baıqalmaıdy, - delingen aqparatta.
Sonymen qatar Qandysý sý qoımasy tekserildi. Qazirgi ýaqytta sý qoımasy tranzıttik rejımde jumys istep, onda sý jınaqtaý júrgizilmeıdi.
- Jalpy tekserilgen aýdandar boıynsha sý tasqyny jaǵdaıy turaqty. Gıdrobeketterdegi sý deńgeıi qaýipti mejeden tómen. Sýdyń ózen arnalarynan asý faktileri tirkelgen joq, - dedi ShQO TJD bastyǵynyń orynbasary Amangeldi Ensegenov.
Eske salsaq, osyǵan deıin Qostanaıda Ulttyq ulan sý tasqynyna qarsy aldyn alý sharalaryna jumyldyrylǵany jaıly jazǵanbyz.
