Shyǵys Qazaqstan aýmaǵynda 11 qar barysy mekendeıdi
ÓSKEMEN. KAZINFORM – Shyǵys Qazaqstan oblysynda Qyzyl kitapqa engen janýarlardyń 60-qa jýyq túri kezdesedi.
Óńir aýmaǵynda Qazaqstannyń Qyzyl kitabyna engizilgen sırek jáne joıylyp ketý qaýpi bar janýarlardyń 57 túri meken etedi. Sırek kezdesetin janýarlardyń sanyn oblystyq Tabıǵı resýrstar jáne tabıǵat paıdalanýdy retteý basqarmasynyń mamandary eseptep shyqty.
– Qazirgi tańda Shyǵys Qazaqstan oblysynda Qyzyl kitapqa engen keı janýarlardyń sanyn aıtar bolsaq, qar barysy - 11, dýadaq - 62, lashyn - 88, búrkit - 75. Oblys aýmaǵynyń edáýir bóligin, ıaǵnı 1,3 mıllıon gektardan astam jerin - erekshe qorǵalatyn tabıǵı aýmaqtar alyp jatyr. Mundaı aýmaqtar sırek ári joıylyp ketý qaýpi bar janýarlar túrlerin saqtaýǵa múmkindik berip otyr, - dep habarlady basqarmadan.
Eske salsaq, osyǵan deıin Mańǵystaýda sońǵy tórt jylda 3 433 ıtbalyq qyrylǵany jaıly jazǵanbyz.
