Shyǵys arhıvterinen Qazaqstan tarıhyna qatysty myńdaǵan eńbek tabyldy — shyǵystanýshy
ALMATY. KAZINFORM — Almatyda «Qazaqstan men Shyǵys áleminiń tarıhı-mádenı, saıası-ekonomıkalyq qarym-qatynastary: tarıhy, búgini jáne damý betalysy» atty halyqaralyq ǵylymı-praktıkalyq konferentsııasy ótip jatyr.
R.B. Súleımenov atyndaǵy Shyǵystaný ınstıtýtynyń bas dırektory Dúken Másimhanuly konferentsııada Qazaqstannyń Shyǵys elderimen tarıhı, mádenı jáne ekonomıkalyq baılanysyn zertteý ne úshin mańyzdy ekenin aıtty.
Sózinshe, Qazaqstan táýelsizdik alǵannan keıin Batys jáne Shyǵys elderimen dıplomatııalyq qarym-qatynas ornata bastady. Sol sebepti úkimettiń aldynda eki Batys jáne Shyǵysty zertteý mindeti turdy deıdi. Osylaısha Qazaqstannyń shyǵys elderimen baılanystaryn ǵylymı turǵydan zertteıtin jáne ulttyq tarıhqa qatysty sheteldik derekterdi anyqtap, ǵylymı aınalymǵa engizetin mamandandyrylǵan ǵylymı mekeme quryldy.
— Shyǵys elderiniń tarıhyn, mádenıetin, tili men dinin, qoǵamdyq-saıası jáne áleýmettik-ekonomıkalyq damýyn zertteý — ǵylymı qyzyǵýshylyq qana emes, strategııalyq múddelermen sabaqtas mańyzdy mindet. Eki jarym jyldyq otarshyldyq kezeńde biz tarıhı jadymyzdan aıyrylyp qaldyq. Al Shyǵys mádenıetinde bizde umyt bolǵan tilimiz, órkenıetimizdi taba alamyz, — dedi ol.
Aıtýynsha, Shyǵys elderin zertteý arqyly Qazaqstan óziniń ejelgi tarıhynyń umyt bolǵan jaýharyn taba alady. Nátıjesinde ejelgi tarıh, orta ǵasyr, Altyn orda kezeńi jáne Qazaq handyǵyna qatysty myńdaǵan eńbek Shyǵys elderiniń arhıvinen alyndy deıdi.
— 30 jyl — bir beles. Konferentsııada Qazaqstan 30 jylda Shyǵysty zertteý arqyly qandaı nátıjege jetkenin, ne anyqtaǵanyn halyqqa pash etemiz, búgin esep beremiz, — dedi Shyǵystaný ınstıtýtynyń bas dırektory.
Konferentsııa barysynda Qazaqstan men Shyǵys elderiniń saıası-ekonomıkalyq jáne mádenı yntymaqtastyǵy, aımaqtyq qaýipsizdik, halyqaralyq uıymdar aıasyndaǵy seriktestik, Jibek jolynyń tarıhı mańyzy, sondaı-aq Ortalyq Azııadaǵy dinı ahýal men túrkitildes memleketterdiń ıntegratsııasy máseleleri talqylanbaq.
Sondaı-aq ınstıtýttyń 30 jyldyǵyna arnalǵan «Ordaly otyz jyl» kitap-albomy men konferentsııa materıaldarynyń jınaǵy tanystyrylyp, ǵylymı jarııalanymdar kórmesi uıymdastyrylady.
Eske salsaq, Qazaqstannyń zaıyrlylyq tájirıbesi Varshavadaǵy EQYU konferentsııasynda tanystyryldy.
