Shyǵarmashylyq erkindik boıynsha memleket jaǵdaı jasaýy qajet – depýtat

ASTANA. KAZINFORM – Konstıtýtsııalyq komıssııada balalarǵa qosymsha bilim berýdi memlekettiń kepildigine engizý usynyldy. Bul týraly Májilis depýtaty Murat Ábenov málim etti. 

– Shyǵarmashylyq erkindik boıynsha tıisti normany engizýge qatysty áriptesterim kelisimin berdi. Shyǵarmashylyq ári sóz erkindigi, ǵylymı zetteý erkindigi boıynsha tıisti usynystar bar. Osy baǵyttaǵy tıisti qadamdarsyz ekonomkany damytý qıynǵa túsedi, jańa ınnovatsııa jasaýǵa múmkindik bolmaıdy. Meniń áriptesterim (Konstıtýtsııalyq komıssııada) qoldap jatyr, sondyqtan usynystar jańa Konstıtýtsııaǵa enedi dep oılaımyn. Biraq, meniń erkindigim basqa adamnyń erkindigine zııanyn tıgizbeýi kerek, - dedi M. Ábenov.

Onyń paıymynsha, shyǵyrmashylyq erkindik boıynsha memleket kepildik berýi qajet. 

– Máselen, qazir keleshek mektepteri ashylyp jatyr. Bul óz kezeginde bilim berý nysandaryna zamanaýı zertteýler júrgizýge múmkindik beredi. Oǵan sońǵy býyndy qurylǵylar, túrli robottar jetkizilip jatyr. Osy oraıda sonshalyqty tabysy joǵary emes ata-analardyń balalary shyǵarmashylyqpen emin-erkin aınalysa alady. Munyń arqasynda qazir balalar túrli jarystarǵa, olımpıadalarǵa baryp jatyr. Bul turǵyda memlekettiń kepildigin jazyp qoıýdy usyndym. Balalardyń tek orta bilimine ǵana emes, izdenýge jáne ınnovatsııamen aınalysýyna qosymsha bilim berýdi memlekettiń kepildigine engizý kerek ekenin aıttym. Qazir osyny pysyqtap jatyrmyz, - dedi depýtat. 

Budan buryn habarlanǵandaı, Konstıtýtsııalyq reforma jónindegi komıssııanyń alǵashqy otyrysynda M. Ábenov Konstıtýtsııada shyǵarmashylyq erkindiktiń mazmunyn naqtylap kórsetýdi usyndy.  

Al tórtinshi otyrysta Konstıtýtsııalyq sot tóraǵasynyń orynbasary Baqyt Nurmuhanov Konstıtýtsııalyq reforma komıssııasynyń múshelerine Ata Zańǵa engiziletin ózgeristerdiń jıyntyq jobasyn tanystyrdy.