Shyǵyny kóp Túrkistan áýejaıy senimgerlik basqarýǵa qashan beriledi
TÚRKІSTAN. KAZINFORM – Túrkistandaǵy halyqaralyq áýejaıdy senimgerlik basqarýǵa berý máselesi boıynsha kelissózder jalǵasyp jatyr. Oblystyq jolaýshylar kóligi jáne avtomobıl joldary basqarmasy qazirgi tańda áleýetti ınvestormen dıalog júrgizilip jatqanyn málim etti.
Halyqaralyq áýejaıdy senimgerlik basqarýǵa berý múmkindigi aıasynda yqtımal ınvestor retinde júk áýe tasymaldary salasynda jumys isteıtin qazaqstandyq operator – Alpha Sky kompanııasy qarastyrylyp otyr. Sonymen qatar usynylyp otyrǵan format áýejaıdy satyp alý quqyǵyn kózdemeıtini atap ótildi.
– Túrkistan oblysynyń ákimdigi áýejaıǵa menshik quqyǵyn saqtap qalady jáne ınvestormen birlesip ınfraqurylymdy damytý, jolaýshylarǵa kórsetiletin qyzmet sapasyn arttyrý baǵytynda jumys isteýdi josparlap otyr, - dep habarlady oblystyq jolaýshylar kóligi jáne avtomobıl joldary basqarmasy.
Vedomstvo ókilderiniń aıtýynsha, kelissózder tolyq aıaqtalǵannan keıin kelisim sharttaryna qatysty qosymsha aqparat usynylady. Qazirgi tańda taraptar yntymaqtastyqtyń negizgi parametrlerin talqylaýdy jalǵastyryp jatyr.
Túrkistan halyqaralyq áýejaıyn 10 jyl merzimge senimgerlik basqarýǵa berý 2025 jyldyń sońyna deıin josparlanǵan bolatyn. Jobanyń basty maqsaty retinde jolaýshylar aǵynyn arttyrý, júk tasymalyn damytý jáne óńirdiń týrıstik tartymdylyǵyn kúsheıtý kózdelgen.
Bolashaq basqarýshyǵa jańa áýe baǵyttaryn ashý, tasymal kólemin ulǵaıtý jáne áýejaıdy úsh jyl ishinde ózin-ózi aqtaıtyn deńgeıge shyǵarý sııaqty naqty mindetter qarastyrylǵan.
Áýejaıdy basqarýǵa buǵan deıin otandyq jáne sheteldik birqatar kompanııa qyzyǵýshylyq tanytqan. Olardyń qatarynda Qazaq Air, Fly Arystan, Alpha Sky, Turkish Cargo, MNG, ASL Airlines jáne Sovico Group bar.
Bastapqyda vetnamdyq Sovico Group kompanııasymen yntymaqtastyq týraly memorandýmǵa qol qoıylǵanymen, taraptar kelisim sharttaryn kelise almaǵandyqtan, ınvestor jobadan bas tartqan.
Eske salaıyq, Túrkistan halyqaralyq áýejaıy 2020 jyly paıdalanýǵa berilgen jáne oblys ákimdiginiń kommýnaldyq menshiginde ekenin aıta ketken jón. Qazirgi ýaqytta áýejaı shyǵyndy nysan bolyp otyr, ıaǵnı qoldanystaǵy jolaýshylar aǵyny men júk aınalymy aǵymdaǵy shyǵyndardy tolyq óteı almaıdy.
Áýejaı qazirgi tańda tórt halyqaralyq jáne jeti ishki baǵyt boıynsha turaqty reısterge qyzmet kórsetedi. Ushýlardy Turkish Airlines, SCAT, Fly Arystan, Qazaq Air, Wizz Air Abu Dhabi jáne Jazeera Airways áýe kompanııalary júzege asyrady.
Sonymen qatar bıyl qańtar aıynan bastap Oral – Túrkistan baǵyty boıynsha áýe reısteri qaıta jandandyryldy.