Shyǵyn kólemi – 821 mıllıon teńge: HAS qarjy pıramıdasyna taǵy 125 adam aldanyp qalǵan

ASTANA. KAZINFORM – Qarjylyq monıtorıng agenttiginiń Pavlodar oblysy boıynsha departamenti «HAS» qarjy pıramıdasynyń qyzmetinen zardap shekken azamattardyń ótinishi negizinde jańa epızodtar boıynsha sotqa deıingi tergep-tekserýdi bastady.

Buǵan deıin sot qarjylyq pıramıdany uıymdastyrýshylaryn 6 jyldan 12 jylǵa deıingi merzimge bas bostandyǵynan aıyrý jazasyna kesken bolatyn.
Jábirlenýshilerge keltirilgen zalaldy óteý maqsatynda salymshylardyń qarajatyna satyp alynǵan, jalpy quny 1,2 mlrd teńgeden asatyn múlik sottyń sheshimimen óndirip alýǵa jiberildi.

Óndirip alynǵan aktıvterdiń qatarynda 4 páter, 18 avtokólik, 3 jer ýchaskesi, avtoturaq oryndary, turǵyn emes úı-jaı jáne bank shottaryndaǵy aqshalaı qarajat bar.
Sot oryndaýshylary jábirlenýshilerge 300 mln teńge kóleminde tólem júrgizdi.

Qazirgi ýaqytta jalpy somasy 821 mln teńgeden asatyn zalalmen 125-ten astam jábirlenýshiden aryz tústi. Sonymen qatar salymshylardyń qarajaty esebinen uıymdastyrýshy elorda aýmaǵynda ornalasqan, quny 525 mln teńge bolatyn jer ýchaskelerimen birge «A.D.A.M. group» JShS-in satyp alǵany anyqtaldy. Atalǵan múlik ony jasyrý maqsatynda uıymdastyrýshynyń tanysynyń atyna rásimdelgen.

Sottyń sanktsııasymen kórsetilgen múlikke tyıym salyndy.

Osy jyldyń 6 qańtarynda kúdiktilerdiń áreketteri qaıta saralanyp, olarǵa uıymdasqan qylmystyq top qurý jáne oǵan basshylyq etý, qarjylyq pıramıdany uıymdastyrý jáne jarnamalaý, sondaı-aq qylmystyq jolmen alynǵan aqsha men múlikti zańdastyrý baptary boıynsha aıyp taǵyldy.
Tergeý jalǵasyp jatyr.

Qarjylyq monıtorıng agenttigi «HAS» qarjy pıramıdasynyń qyzmetinen zardap shekken azamattardy aýmaqtyq bólimshelerge aryzben júginýge shaqyrady.

Ózderin syrtqy ekonomıkalyq qyzmetpen aınalysatyn kompanııa retinde tanystyryp, azamattardy túrli ınvestıtsııalyq jobalarǵa aqsha salýǵa úgittegen «HAS» qarjy pıramıdasynyń syry ashylǵanyn jazǵan edik.