Shyǵyn kólemi — 579 mln teńge: Aqtóbelik emshi sotta aqshany qaıda jumsaǵanyn aıtpady
AQTÓBE. KAZINFORM — Jaryssózde prokýror emshi Sulýshash Qazbaevany 6 jyl 8 aıǵa bas bostandyǵynan aıyrýdy surady. Іste 136 jábirlenýshi bar.
№ 2 Aqtóbe qalalyq sotynda búgin jaryssóz ótti. Prokýror Gúlnazym Alıeva emshiniń dıspanserlik esepte turmaıtynyn, ol jasaǵan qylmys qoǵamdyq sıpaty bar ekenin eskerip, bas bostandyǵynan aıyrý jazasynyń eń joǵarǵy merzimin taǵaıyndaýdy surady.
— Sottalýshy S.Qazbaeva nesıeni tóleý kestesi ózinde bolǵanyn joqqa shyǵarmady. Alaıda óziniń kinásin moıyndamaıtynyn, 136 jábirlenýshiniń eshqaısysynan alaıaqtyq jolmen nesıe almaǵanyn, barlyq jábirlenýshi óz erkimen aqsha alyp bergenin jáne aıyptaý aktisindegi somamen kelispeıtinin kórsetip, jaýap berdi. Qazbaeva sot tergeýi ótken 4 aıda jábirlenýshilerdiń nesıege alǵan aqshasyn qaıda jibergenin aıtpady, bul týraly suraqtarǵa jaýap berýden bas tartty. Qazirgi tańda 579 mln teńgege jaqyn qarajattyń naqty qaıda ketkeni beımálim. Qazbaevany kináli dep tanyp, 6 jyl 8 aıǵa bas bostandyǵynan aıyrý jazasyn taǵaıyndaýdy, jaza óteý ornyn qylmystyq atqarý júıesiniń ortasha qaýipsiz mekemesi dep belgileýdi suraımyn, — dedi prokýror prokýror Gúlnazym Alıeva.
Sot jaryssózi kezinde jábirlenýshilerdiń 1 mln teńgeden bastap 24 mln teńgege deıin nesıe rásimdep, búginde ony ózderi tólep otyrǵany, keıbiri qaryzdy óteýdi toqtatqanyn aıtty. Prokýror sottalýshydan jábirlenýshilerdiń qaryzyn óndirýdi de surady.
Aıta keteıik, emshi Sulýshash Qazbaeva Áıteke bı aýdany Aqkól aýylynda meshit, Áıteke bı aýdanynda toıhana salamyn, kámelet jasqa tolmaǵan qyzyn Túrkııa eline emge aparamyn, jeke klınıka ashyp, kásibin damytamyn dep ózine kelgen emdelýshilerge nesıe rásimdetken. Іs sotta qarala bastaǵanda 90 jábirlenýshi bolyp, keıin taǵy ondaǵan adam qosyldy.
Oǵan Qylmystyq kodekstiń «Alaıaqtyq» babymen aıyp taǵylyp, bıyl qańtar aıynda qamaýǵa alyndy.