Shyǵyn 5 mln teńge: Jetisýda mal urlyǵymen aınalysqan qylmystyq top quryqtaldy
ASTANA. KAZINFORM — Jetisýda polıtseıler mal urlyǵymen aınalysqan qylmystyq topty quryqtap, 9 jylqy aman saqtalyp, iri shyǵynnyń aldyn aldy, dep habarlaıdy Polisia.kz.
Jetisý oblysynda polıtsııa qyzmetkerleri Eskeldi aýdanynda bolǵan jylqy urlyǵyn der kezinde áshkerelep, taǵy bir aýyr qylmystyń jolyn kesti. Túngi mezgilde belgisiz tulǵalar Beǵash aýylynyń shetindegi jaıylymǵa jasyryn kirip, 11 jylqyny aıdap áketken. Keltirilgen zalal shamamen bes mln teńgege baǵalanǵan. Jedel jumyldyrylǵan tártip saqshylarynyń kásibıligi arqasynda qylmys qysqa ýaqyt ishinde ashyldy.
— Oblystyq krımınaldyq polıtsııa basqarmasy men Eskeldi aýdandyq polıtsııa bóliminiń birlesken jedel toby óńirde keshendi is-sharalar júrgizdi. Tintý nátıjesinde kúdiktilerdiń izi anyqtalyp, urlanǵan maldy soıyp jatqan bir sharýa qojalyǵynyń aýmaǵynan úsh er adam ustaldy. Ustalǵandardyń barlyǵy — Jetisý oblysynyń turǵyndary. Arnaıy operatsııa barysynda polıtseıler 9 jylqyny taýyp, al eki jylqyny kúdiktiler soıyp úlgergenin anyqtady. Qazir kúdiktiler qamaýǵa alyndy. Tergeý amaldary jalǵasyp, olardyń ózge de mal urlyǵy derekterine qatystylyǵy tekseriledi, — delingen habarlamada.
Budan buryn polıtsııa úsh kúnde 100-den astam mal urlyǵyn ashqanyn jazǵanbyz.
