Shyǵyn 420 mln teńge: Koreıadan arzan kólik ákelemin dep eldi aldaǵan áıel sottaldy

ASTANA. KAZINFORM — Astanada birneshe azamatty aldap soqqan áıel adam sottaldy. Ol ózin Ońtústik Koreıada senimdi tanystary bardaı kórsetip, tıimdi baǵamen avtokólik ákelip beremin dep ýáde bergen, dep habarlaıdy qalalyq prokýratýranyń baspasóz qyzmeti

Jábirlenýshiler tolyq aldyn ala tólem jasaǵannan keıin, alaıaq olardy jalǵa berý kompanııalarynan ýaqytsha alynǵan kóliktermen aldap kelgeni anyqtaldy.

Máselen, ol bir azamattan 4 kólik ákelip beremin dep 14,5 mln teńge alǵan. Biraq kólikter resmı tirkelmegen, al aqsha jeke maqsattarǵa jumsalǵan. Qylmysker jalǵan áreketterin jasyrý úshin kólikterdi jalǵa alý aqshasyn da ózi tólep otyrǵan.

— Jalpy alǵanda, alaıaqtyń is-áreketinen 70-ten astam adam zardap shekti, keltirilgen shyǵyn kólemi 420 mln teńgege jetti. Sotta onyń jábirlenýshilerge ýáde etken qyzmetin oryndaýǵa múmkindigi bolmaǵany, aqshany jeke qajetine jumsaǵany dáleldendi. Ol kinásin tolyq moıyndap, 6 jyl 8 aı merzimge bas bostandyǵynan aıyryldy. Jábirlenýshilerdiń azamattyq talaptary sotpen tolyq qanaǵattandyryldy, — delingen habarlamada.

Astana qalasynyń prokýratýrasy azamattarǵa qyzmet kórsetýge ruqsat beretin qujattary joq adamdarmen kelisimshart jasamaýǵa keńes beredi.

Budan buryn Tarazda birneshe ret alaıaqtyq jasaǵan sheteldik azamat elden shyǵarylǵany belgili boldy.