Shyǵyn - 40 mln teńge: Jumysqa turmaq bolǵan adamdardy aldaǵan eki aqtóbelik sottaldy

AQTÓBE. KAZINFORM - Aqtóbe qalalyq sotynda 170-ten astam adamǵa jumys taýyp berýge ýáde etip, qyzmeti úshin 50-700 myń teńge kóleminde aqsha alǵan eki sottalýshyǵa úkim shyqty. Olardyń biri 6, ekinshisi 4 jylǵa bas bostandyǵynan aıyryldy.

Munaı kompanııasyna jumysqa turyp, joǵary jalaqy almaq bolǵan adamdar aldanyp qaldy. Aqtóbe qalalyq №2 soty baspasóz qyzmetiniń habarlaýynsha, eki sottalýshyǵa qatysty is Qylmystyq kodekstiń “Alaıaqtyq” baby boıynsha qaraldy.

Іs materıalyna súınsek, M jáne A 2022 - 2023 jyldary aralyǵynda turǵyndarǵa Atyraý oblysynda ornalasqan ken ornyna vahtalyq ádispen jumysqa ornalastyratynyn aıtyp, sendiredi. Ár jábirlenýshiden 50-700 myń teńge aralyǵynda aqsha alyp, nátıjesinde 172 jábirlenýshiden jalpy 40 mıllıon teńge ıemdengen.

Sottalýshynyń biri buǵan deıin de alaıaqtyq jasaǵany úshin sottalǵan bolyp shyqty. 

- Sottyń úkimimen sottalýshylar kináli dep tanylyp, A 6 jyl merzimge, al M 4 jylǵa bas bostandyǵynan aıyryldy. Sonymen qatar sot sottalǵandardy kommertsııalyq uıymdarda laýazymdy qyzmet atqarý quqyǵynan aıyrý túrindegi qosymsha jaza taǵaıyndady. Jábirlenýshilerdiń azamattyq talaptary qanaǵattandyryldy,- dep habarlady Aqtóbe qalasynyń №2 sotynyń baspasóz qyzmeti.

Sot úkimi zańdy kúshine engen joq.