Shyǵyn 3,6 mlrd teńge: Qazatomónerkásiptiń top-menedjeri ýran saýdasy úshin sottaldy

ASTANA. KAZINFORM — Astanada «Qazatomónerkásip» ulttyq atom kompanııasynyń kommertsııa jónindegi bas dırektory B.-ǵa qatysty sot úkimi shyqty. Ol Qylmystyq kodeksiniń 361-baby 4-bóliginiń 3-tarmaǵy boıynsha qyzmettik ókilettikterin teris paıdalaný baby boıynsha aıyptalǵan. 

2021 jyly B. eki aılyq kelisimshart jasaý merzimi ótip ketkennen keıin ýrandy tómendetilgen baǵamen satý jóninde úsh qysqamerzimdi kelisimshart jasasqan. Bul áreketteri memleketke asa iri kólemde jalpy somasy 16,5 mlrd teńge kóleminde zalal keltirgen.

— 2021-2022 jyldary tómen naryqtyq quny boıynsha ýrandy satý arqyly 10 shart jasasyp, sharttar jasalǵan kúni ýrannyń quny ofertany jiberý kezindegi belgilengen baǵanyń ortasha máninen tómen bolyp, memleketke jalpy somasy 3,6 mlrd teńge asa iri mólsherde zalal keltirgen, — dep habarlady Astana qalalyq qylmystyq ister jónindegi mamandandyrylǵan aýdanaralyq soty.

Nátıjesinde B. bul 13 kelisimshart boıynsha jalpy somasy 9 mıllıon teńge kóleminde bonýs túrinde syıaqy alǵan.

— B. tórt jyl alty aıǵa bas bostandyǵynan aıyryldy, múlki tárkilenedi. Sonymen qatar ol memlekettik qyzmette jáne kvazımemlekettik sektorda laýazym atqarý quqyǵynan ómir boıyna aıyryldy. Sondaı-aq sot úkimine sáıkes, sottalǵan azamatty «Eren eńbegi úshin» medalinen aıyrý týraly usynys Prezıdentke joldandy, — dep habarlady sot.

Jábirlenýshi taraptyń azamattyq talaby qanaǵattandyryldy. Úkim zańdy kúshine engen joq.

Aıta ketelik BQO-da 35 mln teńge jymqyrǵan aýrýhana býhgalteri 7 jylǵa sottaldy.