Shyǵyn 33 mıllıard dollar: Izraıl byltyr Gaza ınfraqurylymynyń 90 paıyzyn joıdy
ASTANA. KAZINFORM — 2025 jyly Izraıl shabýylynyń kesirinen Gaza ekonomıkasyna keltirilgen shyǵyn 33 mıllıard dollardan asty. Gaza sektorynyń baspasóz qyzmeti Izraıl shabýyldarynyń áseri týraly jyl saıynǵy statıstıkany jarııalady, dep habarlaıdy Anadoly.
2025 jyly ómirlik mańyzdy 15 saladaǵy tikeleı shyǵyn 33 mıllıard dollardan asty.
Agenttik aýyl sharýashylyǵy salasyna, ásirese mal sharýashylyǵy men balyq sharýashylyǵyna keltirilgen zalaldy eseptedi. Shamamen 17 800 gekta aýyl sharýashylyǵy jeri, ıaǵnı jalpy aýmaqtyń 80%-dan astamy zaqymdanǵan.
Baıandamada kókónis ósirý 9300 gektardan 400 gektarǵa deıin qysqaryp, Izraıl shabýyldary 1000 aýyl sharýashylyq sý qudyqtaryn jáne 500 iri qara, qoı jáne qus fabrıkasyn qıratty.
Izraıl shabýyldarynyń kesirinen 700-den astam sý qubyry uńǵymalary, 3080 shaqyrym elektr jelisi, 400 shaqyrym sý qubyry men káriz jelileri qıraǵan.
Gazada Izraıl qıratqan joldardyń uzyndyǵy eki myń shaqyrymǵa jetti, 150 úkimettik ǵımarat, 250 sport jáne mádenı nysandar tolyǵymen qırap, arheologııalyq jáne tarıhı oryndarǵa da shabýyl jasaldy.
Málimdemede Izraıl armııasynyń 2025 jyly Gazada 112 myńnan astam bomba qoldanǵany, Gaza ınfraqurylymynyń 90 paıyzyn qıratqany jáne eksklav aýmaǵynyń 55 paıyzyn basyp alǵany atap kórsetildi.
Basylym 2025 jyly Izraıl 22 aýrýhanany jaramsyz etip, 211 jedel járdem kóligine jáne azamattyq qorǵanystyń 23 kóligine shabýyl jasaǵanyn jazady.
Izraıl armııasy Gazadaǵy mektepterdiń 95 paıyzyna zaqym keltirdi. 30 oqý orny tolyǵymen, 39-y jartylaı qırap, 1000-nan astam stýdent, 88 oqytýshy, 45 ýnıversıtet professory qkóz jumdy.
Izraıl Gaza sektoryndaǵy 34 meshitti tolyǵymen qıratyp, 100-in jartylaı qıratty, sonymen qatar úsh shirkeýge birneshe ret shabýyl jasady. Gazadaǵy 60 zırattyń 21-i Izraıl shabýyldary kezinde tolyǵymen joıyldy.
Izraıl 2025 jylǵa deıin Gazadaǵy 106 400 úıdi tolyǵymen qıratty.
— 2025 jyly Izraıl Gazadaǵy 106 400 úıdi tolyǵymen qıratyp, 66 000 úıdi qatty zaqymdap, turýǵa jaramsyz etip, taǵy 41 000 úıdi ishinara zaqymdady. Eksklavtaǵy ishki qonys aýdarýshylardyń sany shamamen eki mıllıonǵa jetti. Infraqurylymnyń qıraýy saldarynan qosymsha 213 000 palestınalyq el ishinde bosqynǵa aınaldy, — delingen habarlamada.
Sonymen qatar, Izraıl áskeri el ishinde qonys aýdarǵan palestınalyqtar panalaǵan 87 baspanaǵa shabýyl jasady.
Eske salaıyq, Izraıl Qorǵanys mınıstrligi Gaza sektorynda beketter qurý týraly aıyptaýdy joqqa shyǵardy.