Shyǵyn 100 mln. Aqtóbede adamdardy aldap, nesıe rásimdetken emshi qamaldy
AQTÓBE. KAZINFORM — Aqtóbe qalasynda emshi ýaqytsha ustaý ızolıatoryna qamaldy. Ol adamdardy aldap, nesıe rásimdedi degen kúdikke ilikti.

Aqtóbe qalasynda Qylmystyq kodekstiń «Alaıaqtyq» baby boıynsha is qozǵaldy. Emshi ózine senip kelgen adamdarǵa nesıe rásimdetip, asa iri kólemde shyǵyn keltirgen. Qazir tergeý júrip jatyr.
— Búgingi kúni otyzǵa jýyq jábirlenýshi bar. Tergep-tekserý barysynda Aqtóbe qalasynda dástúrli emes medıtsınamen aınalysqan áıel anyqtaldy. Ol syrqat balasyn emdetýge, meshit qurylysyna, jańa massaj kabınetin ashýǵa dep senimge kirgen. Túrli bankterden bir mıllıon teńgeden 18 mıllıonǵa teńgege deıingi somada nesıeler rásimdetken. Áıeldiń úıine emdelýge kelýshiler onyń aıtqanyna senip, óz attaryna onlaın nesıeler rásimdegen. Aqshany emshiniń esepshotyna aýdarǵan. Kúdikti nesıelerdi ózi tóleıtinin aıtyp sendirgenimen, ýádesinde turmaǵan. Jábirlenýshilerdiń basym kópshiligi áıelder. Qazirgi ýaqytta jábirlenýshilerge keltirilgen zalaldyń jalpy somasy 100 mıllıon teńgege jýyqtaıdy, — dedi Aqtóbe oblystyq PD baspasóz qyzmeti.
Qazirgi kezde kúdikti ýaqytsha ustaý ızolıatoryna qamaldy. Sotqa deıingi tergep-tekserý jalǵasyp jatyr. Sonymen birge osy is boıynsha basqa da jábirlenýshilerdiń bar-joǵy, aqshany qandaı maqsattarǵa jumsaǵany anyqtalyp jatyr.
Eske salsaq, Shymkentte jalǵan qujat jasap, alaıaqtyqpen aınalysqan kúdikti izdestirilip jatyr. Polıtsııa qyzmetkerleri asa iri mólsherde alaıaqtyq jasaǵan kúdiktiniń sýretin jarııalady.